காசோலை பரிவர்த்தனையில் கூடுதல் பாதுகாப்பு: தமிழ்நாடு மெர்கன்டைல் வங்கி புதிய அறிவிப்பு

ரூ.5 லட்சம் மற்றும் அதற்கு மேற்பட்ட காசோலைகளுக்கு 'பாசிட்டிவ் பே' முறை கட்டாயம் என்று தமிழ்நாடு மெர்கன்டைல் வங்கி அறிவித்துள்ளது.  இந்த நடைமுறை ஏப்.1ஆம் தேதி முதல் அமலுக்கு வருகிறது.

தமிழ்நாடு மெர்கன்டைல் வங்கி, காசோலை பரிவர்த்தனைகளை மேலும் பாதுகாப்பானதாக்கும் வகையில், 5 லட்சம் ரூபாய் மற்றும் அதற்கு மேற்பட்ட மதிப்பிலான காசோலைகளுக்கு 'பாசிட்டிவ் பே சிஸ்டம்' (Positive Pay System - PPS) எனும் உறுதிப்படுத்தும் முறையைத் தற்போது கட்டாயமாக்கியுள்ளது.

இது குறித்து வங்கியின் கிளை வங்கிப் பிரிவுக்கான தேசியத் தலைவர் மற்றும் செயல் துணைத் தலைவர் பி.ஆர். அசோக் குமார் விடுத்துள்ள செய்திக்குறிப்பில் தெரிவித்துள்ளதாவது: வங்கியின் வாடிக்கையாளர்கள் கிளியரிங், பணப் பரிமாற்றம் (Transfer), NEFT, RTGS அல்லது ரொக்கம் பெறுவதற்காக 5 லட்சம் ரூபாய் அல்லது அதற்கு மேற்பட்ட தொகைக்கு காசோலைகளை வழங்கும்போது, அதனை வழங்கியவர் (Drawer) வங்கியிடம் முன் கூட்டியே 'பாசிட்டிவ் பே' முறையில் உறுதிப்படுத்த வேண்டும். அவ்வாறு உறுதிப்படுத்தப்படாத காசோலைகள் வங்கியில் ஏற்றுக்கொள்ளப்படாமல் திருப்பி அனுப்பப்படும் (Returned).

பாசிட்டிவ் பே உறுதிப்படுத்துதலுக்குக் கீழ்க்கண்ட அடிப்படை விவரங்களைத் தெரிவிக்க வேண்டும்:

• கணக்கு எண் (Account Number)

• காசோலை எண் (Cheque Number)

• காசோலை தேதி (Cheque Date)

• தொகை (Amount)

•  பணம் பெறுபவரின் பெயர் (Payee Name)

வாடிக்கையாளர்கள் தங்களின் காசோலை விவரங்களை வங்கிக்குத் தெரிவிக்கக் கீழ்க்காணும் வசதிகளைப் பயன்படுத்தலாம்:

• டி.எம்.பி (TMB) மொபைல் பேங்கிங் ஆப்

• இணைய வங்கிச் சேவை (Internet Banking)

• டி.எம்.பி டிஜிலாபி (TMB Digilobby)

• வங்கியின் அதிகாரப்பூர்வ இணையதளம் (Web Portal)

• வங்கியின் கிளை அலுவலகக் கவுண்டர்கள்

விவரங்களைச் சமர்ப்பித்தவுடன், வாடிக்கையாளரின் பதிவு செய்யப்பட்ட மின்னஞ்சல் முகவரிக்கு உறுதிப்படுத்தப்பட்டதற்கான மின்னணு ஒப்புகைச் சீட்டு (e-acknowledgement) அனுப்பி வைக்கப்படும்.

இது தொடர்பான கூடுதல் விவரங்கள் அல்லது உதவிகளுக்கு வாடிக்கையாளர்கள் தங்களுக்கு அருகிலுள்ள வங்கி கிளையையோ அல்லது வங்கியின் வாடிக்கையாளர் சேவை மையத்தையோ +91 9842 461 461 என்ற எண்ணிலோ, அல்லது 180 0425 0426 என்ற தேசியக் கட்டணமில்லா எண்ணிலோ தொடர்பு கொள்ளலாம்.

காசோலை பரிவர்த்தனைகளைப் பாதுகாப்பான முறையில் மேற்கொள்வதற்கு வாடிக்கையாளர்கள் முழு ஒத்துழைப்பு வழங்க வேண்டும் என வங்கி நிர்வாகம் கேட்டுக்கொண்டுள்ளது.