பேரறிவாளன் வழக்கறிஞராகப் பதிவு: நீதித்துறைக்கே இழுக்கு

» செய்திகள் - விளையாட்டு » தமிழகம்

பேரறிவாளன் வழக்கறிஞராகப் பதிவு: நீதித்துறைக்கே இழுக்கு - காங். எம்பி சுதா கடும் கண்டனம்

புதன் 29, ஏப்ரல் 2026 4:23:21 PM (IST)

முன்னாள் பிரதமர் ராஜீவ் காந்தி கொலை வழக்கில் தண்டனை பெற்று விடுதலையான பேரறிவாளன், வழக்கறிஞராகப் பதிவு செய்திருப்பதற்கு காங்கிரஸ் கட்சி கடும் எதிர்ப்பு தெரிவித்துள்ளது. இது நீதித்துறையின் கருப்பு நாள் என காங்கிரஸ் எம்பி சுதா விமர்சித்துள்ளார்.

சென்னை உயர்நீதிமன்ற வளாகத்தில் இன்று செய்தியாளர்களைச் சந்தித்த சுதா கூறியதாவது: "ஏப்ரல் 27-ம் தேதி இந்திய அரசியலமைப்பின் கருப்பு நாள். ராஜீவ் காந்தி கொலை வழக்கில் தண்டனை பெற்ற பேரறிவாளன் வழக்கறிஞராகப் பதிவு செய்திருப்பது நீதித்துறைக்கே இழுக்கு. தீவிரவாதச் செயலில் ஈடுபட்டுத் தண்டனை பெற்ற ஒருவருக்கு வழக்கறிஞராகப் பதிவு செய்ய யார் அனுமதி அளித்தது?

தற்போது பார் கவுன்சிலுக்குத் தேர்தல் நடைபெற்றுள்ள சூழலில், புதிய வழக்கறிஞர்களைப் பதிவு செய்ய அந்த உறுப்பினர்களுக்கு எந்த உரிமையும் இல்லை. இந்த நிலை நீடித்தால் குற்றவாளிகள் எளிதாக வழக்கறிஞர் ஆகிவிடுவர். வழக்கறிஞர் என்ற போர்வையில் தீவிரவாதிகள் ஊடுருவுவதை அனுமதிக்க மாட்டோம்.

பேரறிவாளன் பதிவை ரத்து செய்யக் கோரி குடியரசுத் தலைவர் திரௌபதி முர்மு, பிரதமர் நரேந்திர மோடி, உச்ச நீதிமன்ற தலைமை நீதிபதி மற்றும் தமிழக முதலமைச்சர் ஆகியோருக்குக் கடிதம் அனுப்பியுள்ளேன். இதற்கு காரணமானவர்கள் மீது விசாரணை நடத்தி கடும் நடவடிக்கை எடுக்க வேண்டும்."

பேரறிவாளன் தரப்பு விளக்கம்:

31 ஆண்டு சிறைவாசத்திற்குப் பிறகு 2022-ல் உச்ச நீதிமன்றத்தால் விடுதலை செய்யப்பட்ட பேரறிவாளன், சிறையிலிருந்தபோதே கல்வியில் ஆர்வம் காட்டி வந்தார். விடுதலையான பிறகு பெங்களூரு சட்டக் கல்லூரியில் பயின்று 2025-ல் பட்டம் பெற்றார். அகில இந்திய பார் தேர்விலும் (AIBE) வெற்றி பெற்ற அவர், கடந்த ஏப்ரல் 27 அன்று தமிழ்நாடு மற்றும் புதுச்சேரி பார் கவுன்சிலில் வழக்கறிஞராகப் பதிவு செய்தார்.

இது குறித்துப் பேசிய பேரறிவாளன், "சட்ட உதவி கிடைக்காமல் சிறையில் வாடும் ஏழை எளிய கைதிகளின் குரலாக ஒலிக்கவே நான் வழக்கறிஞராகியுள்ளேன். தண்டனைக்குப் பிந்தைய மறுஆய்வுச் சட்டங்கள் இந்தியாவில் வலுப்பெற வேண்டும் என்பதே எனது கனவு" எனத் தெரிவித்துள்ளார்.

மக்கள் கருத்து

மக்கள் பதிவு செய்யும் கருத்துகள் தணிக்கையின்றி பிரசுரமாகும் வகையில் மென்பொருள் வடிவமைக்கப்பட்டுள்ளது. தொழில்நுட்ப குறைபாடுகள் காரணமாக கருத்துக்கள் பதிவாவதில் சிறிது காலதாமதம் ஏற்பட வாய்ப்புள்ளது. வாசகர்களின் கருத்துக்களுக்கு நிர்வாகம் பொறுப்பாக மாட்டார்கள். நாகரீகமற்ற மற்றும் பிறர் மனதை புண்படுத்தகூடிய கருத்துகளை / வார்த்தைகளைப் பயன்படுத்துவதை தவிர்க்கும்படி கேட்டுக்கொள்கிறோம்.

ஆங்கிலத்தில் தட்டச்சு செய்ய Ctrl+G -ஐ அழுத்தவும்.

பெயர்: கருத்து:

பேரறிவாளன் வழக்கறிஞராகப் பதிவு: நீதித்துறைக்கே இழுக்கு - காங். எம்பி சுதா கடும் கண்டனம்

» செய்திகள் - விளையாட்டு » தமிழகம்