தவெக விழாவில் நடனமாடிய தலைமை ஆசிரியை பணியிடை நீக்கம்: : கல்வி அலுவலர் நடவடிக்கை!

தமிழக வெற்றிக் கழகம் சார்பில் நடைபெற்ற மகளிர் தின விழாவில், நடிகர் விஜய்யின் பாடலுக்கு நடனமாடிய அரசுப் பள்ளி தலைமை ஆசிரியை பணியிடை நீக்கம்  செய்யப்பட்டுள்ளார்.

தஞ்சாவூர் மாவட்டம், பின்னையூரைச் சேர்ந்தவர் கிருஷ்ணவேணி (58). இவர் சங்கரநாதர்குடிக்காடு ஊராட்சி ஒன்றிய தொடக்கப்பள்ளியில் தலைமை ஆசிரியையாகப் பணியாற்றி வருகிறார். அத்துடன், வெள்ளத்தேவன் விடுதி ஊராட்சி ஒன்றிய தொடக்கப்பள்ளியின் பொறுப்பு தலைமை ஆசிரியையாகவும் கூடுதல் பொறுப்பு வகித்து வருகிறார்.

சமீபத்தில் ஒரத்தநாட்டில் தமிழக வெற்றிக் கழகம் சார்பில் சர்வதேச மகளிர் தின விழா கொண்டாடப்பட்டது. இந்த விழாவில் சிறப்பு அழைப்பாளராகக் கலந்துகொண்ட தலைமை ஆசிரியை கிருஷ்ணவேணி, மேடையில் உற்சாகமாக நடிகர் விஜய்யின் சினிமா பாடலுக்கு நடனமாடியுள்ளார். அவர் நடனமாடிய காட்சிகளை அங்கிருந்தவர்கள் தங்களது கைபேசியில் படம்பிடித்து சமூக வலைதளங்களில் பதிவிட்டனர். இந்த வீடியோ இணையத்தில் வேகமாகப் பரவி பெரும் விவாதத்தை ஏற்படுத்தியது.

அரசுப் பணியில் இருந்துகொண்டு, அரசியல் கட்சி விழாவில் பங்கேற்று நடனமாடியது ஆசிரியர் நடத்தை விதிகளுக்கு எதிரானது எனப் புகார்கள் எழுந்தன. இது குறித்து விசாரணை நடத்திய பட்டுக்கோட்டை மாவட்ட தொடக்கக் கல்வி அலுவலர் மதியழகன், ஒழுங்கு நடவடிக்கை காரணமாகத் தலைமை ஆசிரியை கிருஷ்ணவேணியைப் பணியிடை நீக்கம் செய்து அதிரடி உத்தரவு பிறப்பித்துள்ளார். இந்தச் சம்பவம் தஞ்சை மாவட்ட கல்வி வட்டாரத்தில் பெரும் பரபரப்பை ஏற்படுத்தியுள்ளது.