ஆசிய டேக்வாண்டோ போட்டியில் தங்கம் வென்று குமரி மாவட்ட மாற்றுத்திறனாளி வீரர் சாதனை!

கன்னியாகுமரி மாவட்டம், பத்மநாபபுரம் தொகுதிக்கு உட்பட்ட சரல்விளை பகுதியைச் சேர்ந்தவர் பிளெஸ்சிங் ஷைஜி (வயது 25). இரு கைகளையும் இழந்த மாற்றுத்திறனாளியான இவர், அனைத்துக் கடினமான சூழ்நிலைகளையும் கடந்து கடந்த 2023-ஆம் ஆண்டு முதல் டேக்வாண்டோ தற்காப்புக் கலைப் பயிற்சியைத் தீவிரமாகப் பெற்று வருகிறார். 

இந்நிலையில், கடந்த மே மாதம் மங்கோலியாவில் நடைபெற்ற ஆசிய அளவிலான டேக்வாண்டோ போட்டியில் இந்தியாவின் சார்பில் பங்கேற்ற இவர், தனது அபாரத் திறமையால் தங்கப் பதக்கம் வென்று நாட்டிற்கும், சொந்த மாவட்டத்திற்கும் பெருமை சேர்த்துள்ளார்.

முன்னதாக, மங்கோலியாவில் நடைபெற்ற இந்த சர்வதேசப் போட்டியில் பங்கேற்க அழைப்பு வந்தபோது, பிளெஸ்சிங் ஷைஜியின் குடும்பப் பொருளாதார நெருக்கடி காரணமாக அங்குச் செல்வதற்கான பயணச் செலவிற்குப் பணமின்றி அவர் பெரிதும் தவித்து வந்தார். இக்கட்டான இந்தச் சூழ்நிலையை அறிந்த கன்னியாகுமரி நாடாளுமன்ற உறுப்பினர்  விஜய் வசந்த், தனது சொந்த நிதியிலிருந்து ரூ. 4.50 லட்சம் வழங்கி மங்கோலியா செல்ல முழுமையாக உதவினார்.

போட்டியில் தங்கம் வென்று சாதனைப் பதக்கத்துடன் தாயகம் திரும்பிய பிளெஸ்சிங் ஷைஜி, நாடாளுமன்ற உறுப்பினர் விஜய் வசந்தை நேரில் சந்தித்து, தனது விளையாட்டுப் பயணத்திற்குப் பக்கபலமாக இருந்ததற்கு நெஞ்சார்ந்த நன்றியைத் தெரிவித்துக் கொண்டார்.

பின்னர் செய்தியாளர்களைச் சந்தித்த பிளெஸ்சிங் ஷைஜி, "வறுமைச் சூழலில் நான் சர்வதேசப் போட்டியில் பங்கேற்கத் தனது சொந்த நிதியைக் கொடுத்து உதவிய எம்பி விஜய் வசந்த் அவர்களுக்கு எனது வாழ்நாள் நன்றிகள். நான் இரு கைகளையும் இழந்த மாற்றுத்திறனாளியாக இருந்தாலும், விடாமுயற்சியுடன் படித்துப் பட்டம் பெற்ற ஒரு பட்டதாரி  ஆவேன். 

எனவே, எனது எதிர்கால வாழ்வாதாரத்தையும், விளையாட்டுத் திறனையும் கருத்தில் கொண்டு, தகுதியின் அடிப்படையில் எனக்கு ஏதேனும் ஒரு அரசு வேலை வழங்கித் தமிழக அரசு உதவ வேண்டும்" என்று கோரிக்கை விடுத்துள்ளார். மாற்றுத்திறனாளி வீரரின் இந்த சாதனை குமரி மாவட்ட மக்களிடையே பெரும் ஆதரவையும் பாராட்டுகளையும் பெற்றுள்ளது.