ரயில்வேயில் வேலை வாங்கித் தருவதாக ரூ.26.50 லட்சம் மோசடி: முதியவருக்கு 3 ஆண்டுகள் சிறை தண்டனை!

ரயில்வேயில் வேலை வாங்கித் தருவதாகக் கூறி இளைஞர்களிடம் பல லட்சம் ரூபாய் மோசடி செய்த நபருக்கு 3 ஆண்டுகள் சிறை தண்டனை விதித்து தூத்துக்குடி நீதிமன்றம் இன்று தீர்ப்பளித்துள்ளது.

திருநெல்வேலி மாவட்டம் அன்பு நகரைச் சேர்ந்த சிவராமன் (65) என்பவர், கடந்த 2023-ம் ஆண்டு தூத்துக்குடி மாவட்டம் எட்டையபுரத்தைச் சேர்ந்த நான்கு இளைஞர்களிடம் அறிமுகமாகியுள்ளார். அவர்களுக்குத் இந்திய இரயில்வேயில் வேலை வாங்கித் தருவதாக ஆசை வார்த்தை கூறி, நம்பவைத்து மொத்தம் ரூபாய் 26,50,000/- பணத்தைப் பெற்றுக்கொண்டு மோசடி செய்துள்ளார்.

இது குறித்து பாதிக்கப்பட்ட இளைஞர்கள் அளித்த புகாரின் பேரில், தூத்துக்குடி மாவட்டக் குற்றப்பிரிவு-I போலீஸார் வழக்குப் பதிவு செய்து தீவிர விசாரணை மேற்கொண்டனர். விசாரணையின் முடிவில் நீதிமன்றத்தில் இறுதி அறிக்கை தாக்கல் செய்யப்பட்டது.

இவ்வழக்கின் விசாரணை தூத்துக்குடி குற்றவியல் நீதித்துறை நடுவர் நீதிமன்றம் எண்-IV-ல் நடைபெற்று வந்தது. வழக்கை விசாரித்த  நீதிபதி  பாக்கியராஜ், சிவராமன் மீதான குற்றச்சாட்டுகள் நிரூபிக்கப்பட்டதை அடுத்து, அவருக்கு 3 ஆண்டுகள் சிறை தண்டனை மற்றும் ரூபாய் 8,000/- அபராதம் விதித்து இன்று (25.02.2026) தீர்ப்பளித்தார்.

இவ்வழக்கின் சாட்சிகளை நீதிமன்றத்தில் ஆஜர்படுத்தி குற்றவாளிக்கு தண்டனை பெற்று தந்த மாவட்ட குற்றப்பிரிவு - I காவல் துணை கண்காணிப்பாளர் மயில்சாமி மற்றும் இவ்வழக்கினை திறம்பட புலனாய்வு செய்த மாவட்ட குற்றப்பிரிவு - I காவல் ஆய்வாளர் லட்சுமி பிரபா,  அப்போதைய உதவி ஆய்வாளர் அனிதா, நீதிமன்றத்தில் சிறப்பாக வாதிட்ட அரசு தரப்பு வழக்கறிஞர் (பொறுப்பு) முருகப்பெருமாள், வழக்கின் விசாரணைக்கு உதவியாக இருந்த தலைமை காவலர் வைரமணி ஆகியோரையும் மாவட்ட காவல் கண்காணிப்பாளர் சி. மதன் பாராட்டினார்.