குமரி மாவட்டத்தில் தொடர் பைக் திருட்டில் ஈடுபட்ட வாலிபர் கைது: 2 வாகனங்கள் பறிமுதல்!

கன்னியாகுமரி மாவட்டத்தில்  தொடர் பைக் திருட்டில் ஈடுபட்ட வாலிபரை போலீசார் கைது செய்தனர். 

கன்னியாகுமரி மாவட்டத்தில்  அருமனை, குலசேகரம், கடையாலுமூடு, பூதப்பாண்டி காவல் நிலைய எல்லைக்குட்பட்ட பகுதியில் திருட்டு புகார்கள் தொடர்ந்து வந்த வண்ணம் இருந்தது. இப்புகார்கள் சம்பந்தமாக உடனடியாக குற்றவாளிகளை கண்டறிந்து கைது செய்ய  மாவட்ட காவல் கண்காணிப்பாளர் ஸ்டாலின் உத்தரவிட்டார்.

அதன்பேரில் மார்த்தாண்டம் உட்கோட்ட  துணை காவல் கண்காணிப்பாளர் நல்ல சிவம் மேற்பார்வையில் ஆய்வாளர் வீராசாமி மற்றும் உதவி ஆய்வாளர் சுஜின் தலைமையில் விசாரணை மேற்கொள்ளப்பட்டது. விசாரணையில் தொடர் திருட்டில் ஈடுபட்டது திற்பரப்பு பகுதியை சேர்ந்த அச்சுதன் மகன் ஜெகன் (40) என்பது கண்டுபிடிக்கப்பட்டது. 

அவரிடம் இருந்து இரண்டு இருசக்கர வாகனங்கள்  மற்றும் ரப்பர் சீட்டுகள் பறிமுதல் செய்யப்பட்டது. விசாரணையில் அவர் மீது 61 வழக்குகள் நிலுவையில் இருப்பது தெரியவந்தது. இதையடுத்து போலீசார் அவரை கைது செய்து  நீதிமன்றத்தில் ஆஜர் படுத்தி சிறையில்  அடைத்தனர்.