நாகர்கோவிலில் பெண் போலீசிடம் அத்துமீறல்; 2 வாலிபர்கள் அதிரடி கைது

நாகர்கோவிலில் பெண் போலீசிடம் அத்துமீறிய 2 வாலிபர்களை போலீசார் அதிரடியாக கைது செய்தனர்.

நாகர்கோவில் கோட்டார் சவேரியார் ஆலய திருவிழாவையொட்டி நேற்றுமுன்தினம் ஏராளமான போலீசார் பாதுகாப்பு மற்றும் போக்குவரத்தை சீரமைக்கும் பணியில் ஈடுபட்டனர். அந்த வகையில் புதுக்கடை காவல் நிலையத்தில் பணியாற்றும் பெண் போலீஸ் ஒருவர் செட்டிகுளம் பகுதியில் பாதுகாப்பு பணியில் ஈடுபட்டார். அப்போது செட்டிகுளம் கணபதி நகரை சேர்ந்த பிரதீஷ் (வயது 30), திங்கள்நகரை சேர்ந்த பிராங்கிளின் (29) ஆகிய 2 பேரும் மோட்டார் சைக்கிளில் வந்தனர்.

அந்த சமயத்தில் பெண் போலீஸ் இருவரையும் தடுத்து நிறுத்தியதோடு திருவிழாவையொட்டி போக்குவரத்து மாற்றம் செய்யப்பட்டுள்ளது, இந்த வழியாக செல்லக்கூடாது என கூறியுள்ளார். இதனால் பெண் போலீசிடம் வாலிபர்கள் வாக்குவாதத்தில் ஈடுபட்டனர். ஒரு கட்டத்தில் ஆத்திரமடைந்த இருவரும், பெண் போலீசிடம் அத்துமீறியதாக கூறப்படுகிறது. இதுகுறித்து பெண் போலீஸ் கோட்டார் போலீசில் புகார் அளித்தார். அதன்பேரில் பிரதீஷ், பிராங்கிளின் ஆகிய 2 பேர் மீது போலீசிடம் அத்துமீறுதல், அரசு பணி செய்ய விடாமல் தடுத்தல் ஆகிய 2 பிரிவுகளின் கீழ் வழக்குப்பதிந்து கைது செய்தனர்.