தூத்துக்குடி மாவட்ட ஆட்சியராக விஷு மகாஜன் நியமனம் : தேர்தல் ஆணையம் உத்தரவு!

தூத்துக்குடி மாவட்ட ஆட்சியர் இளம்பகவத் மாற்றப்பட்டு புதிய ஆட்சியராக விஷு மகாஜன் நியமனம் செய்யப்பட்டுள்ளார். 

தமிழகத்தில் நடைபெறவுள்ள 2026 சட்டமன்றத் தேர்தலை முன்னிட்டு, தேர்தல் தயார் நிலை குறித்து ஆய்வு செய்த இந்திய தேர்தல் ஆணையம், தூத்துக்குடி மற்றும் சேலம் மாவட்டங்களுக்குப் புதிய மாவட்டத் தேர்தல் அலுவலர்கள் மற்றும் ஆட்சியர்களை நியமித்து அதிரடி உத்தரவு பிறப்பித்துள்ளது.

தேர்தல் ஆணையத்தின் செயலாளர் லதா திரிபாதி வெளியிட்டுள்ள அதிகாரப்பூர்வ அறிவிப்பின்படி: தூத்துக்குடி மாவட்டத்தின் புதிய மாவட்டத் தேர்தல் அலுவலர் மற்றும் ஆட்சியராக விஷு மகாஜன் ஐஏஎஸ் நியமிக்கப்பட்டுள்ளார். சேலம் மாவட்டத்தின் புதிய மாவட்ட தேர்தல் அலுவலர் மற்றும் ஆட்சியராக டாக்டர் அ. அருண் தம்புராஜ் ஐஏஎஸ் நியமிக்கப்பட்டுள்ளார்.

இந்த உத்தரவு உடனடியாக நடைமுறைக்கு வருகிறது. நியமிக்கப்பட்டுள்ள அதிகாரிகள் பணியில் இணைந்தது குறித்த அறிக்கையை ஏப்ரல் 3-ஆம் தேதி (நாளை) காலை 11:00 மணிக்குள் சமர்ப்பிக்க வேண்டும் என்று தமிழக அரசின் தலைமைச் செயலாளருக்குத் தேர்தல் ஆணையம் உத்தரவிட்டுள்ளது. மேலும், தற்போது மாற்றப்பட்டுள்ள அதிகாரிகள், தேர்தல் பணிகள் முடியும் வரை தேர்தல் தொடர்பான வேறு எந்தப் பணிகளிலும் ஈடுபடுத்தப்படக் கூடாது என்றும் அந்த உத்தரவில் குறிப்பிடப்பட்டுள்ளது.