கன்னியாகுமரி - ஹவுரா தினசரி ரயிலாக இயக்க வேண்டும் : பயணிகள் கோரிக்கை

கன்னியாகுமரி - ஹவுரா ரயிலை தினசரி ரயிலாக இயக்க வேண்டும் என்று குமரி மாவட்ட பயணிகள் நலச்சங்கம் கோரிக்கை விடுத்துள்ளது. 

இது தொடர்பாக பயணிகள் நலச்சங்கம் வெளியிட்ட அறிக்கையில், கன்னியாகுமரியிலிருந்து ஹவுராவுக்கு (கொல்கத்தா) திருநெல்வேலி, மதுரை, திருச்சி, விழுப்புரம், சென்னை எழும்பூர் வழியாக வாராந்திர ரயில் சேவை மட்டுமே உள்ளது. இந்த ரயில் 2003-ம் ஆண்டு அறிவிக்கப்பட்டு இதுவரை வாராந்திர ரயில் சேவையாகவே இயக்கப்பட்டு வருகிறது. 

இந்த ரயில் சராசரியாக 184 சதமானம் பயணிகள் பயன்படுத்துகிறார்கள் என்று கணக்குடன் இயங்கிவருகின்றது என்பதை தென் கிழக்கு ரயில்வே மண்டலம் சார்பாக கண்டறியப்பட்டு இந்த தென்மாவட்ட பகுதிகளில் இருந்து கிழக்கு மாநிலமான ஒடிசா மற்றும் மேற்கு வங்காளம் பகுதிகளுக்கு  கூடுதல் ரயில்கள் தேவை நல்ல வரவேற்பு உள்ளது ரயில்வேக்கு அதிக வருவாய் கிடைக்கும் என்பதை ஆய்வு செய்துள்ளனர். இதனை தொடர்ந்து தென்மாவட்டத்தில் கூடுதல் ரயில்கள் இயக்க வேண்டும் என்று திட்டத்தையும் வகுத்து வருகின்றார்கள். 

ஆனால் தெற்கு ரயில்வே சார்பாக இத்தனை ஆண்டுகள் ஆகியும் இதைப்போல் ஒரு ஆய்வு செய்யாமல் எந்த ஒரு நடவடிக்கையும் இன்றி ஆழ்ந்த உறக்கத்தில் உள்ளார்கள். தெற்கு ரயில்வே அதிகாரிகள் வந்து சீட்டை தேய்த்துவிட்டு சம்பளத்தை மட்டும் வாங்கி செல்கிறார்கள் என்பது மட்டும் புலனாகிறது. இது மட்டுமல்லாமல் கன்னியாகுமரி மாவட்ட இருப்பு பாதைகள் அனைத்தும் திருவனந்தபுரம் கோட்டத்தில் உள்ளதால் அவர்கள் கன்னியாகுமரியிலிருந்து மதுரை, திருச்சி மார்க்கத்தில் ரயில்கள் இயக்க இதுபற்றி எந்த ஒரு ஆய்வும் மேற்கொள்ள மாட்டார்கள். 

ஒரு சில வேளைகளில் தெற்கு  ரயில்வே மண்டலம் சார்பாக ஆய்வு மேற்கொள்ள நடவடிக்கை மேற்கொண்டால் திருவனந்தபுரம் மற்றும் மதுரை கோட்டத்துக்கு இடையே நல்ல புரிதல் இல்லாத காரணத்தால் இந்த ஆய்வு ஆரம்பகட்டத்தில் ஊத்தி மூடப்படும். ஆனால் திருவனந்தபுரம் மற்றும் பாலக்காடு கோட்டங்களில் இது போன்று ஏதேனும் புதிய திட்டம்  வந்தால் அவர்கள் நல்ல ஒத்துழைப்புடன் கேரளா பயணிகள் நலன் கருதி நிறைவேற்றி விடுவார்கள். 

அடுத்ததாக புதிய ரயில் ஏதேனும் இயக்குவதற்கு திட்டம் இருந்தால்  அந்த ரயில் சென்னையிலிருந்து இயக்குவார்கள் அல்லது கேரளாவிலிருந்து இயக்குவார்கள்.  கடந்த வாரம் சென்னையிலிருந்து ராஜஸ்தான் மாநிலத்தில் உள்ள பகத் கி கோதிக்கு வாரம் ஐந்து நாள் ரயில் புதிதாக ரயில் இயக்கப்பட்டது குறிப்பிடத்தக்கது. முழு தமிழ்நாடு பயணிகள் பயன்படும் படியாக கன்னியாகுமரியிலிருந்து திருநெல்வேலி, மதுரை, திருச்சி, சென்னை வழியாக  தமிழ்நாடு மக்கள் பயன்படும் படியாக ரயில்கள் இயக்க அவர்களுக்கு மனது வரவே வராது.