பேச்சிப்பாறை அணையிலிருந்து உபரிநீா் வெளியேற்றம்: கோதையாற்றில் வெள்ளப்பெருக்கு

பேச்சிப்பாறை அணையிலிருந்து உபரிநீா் வெளியேற்றப்படுவதால் கோதையாற்றில் வெள்ளப்பெருக்கு ஏற்பட்டுள்ளது. கரையோர பகுதி மக்களுக்கு எச்சரிக்கை விடுக்கப்பட்டுள்ளது.

கன்னியாகுமரி மாவட்டம் முழுவதும் கடந்த சில நாள்களாக பரவலாக மழை பெய்து வருகிறது. பேச்சிப்பாறை, பெருஞ்சாணி அணையின் நீா்ப்பிடிப்புப் பகுதிகளிலும், மலையோரப் பகுதிகளிலும் கன மழை பெய்ததால் அணைகளுக்கு நீா்வரத்து அதிகரித்தது. ஏற்கெனவே பேச்சிப்பாறை, பெருஞ்சாணி அணைகள் முழுக் கொள்ளவை எட்டும் நிலையில் உள்ளதால் அணைகளின் நிலவரம் குறித்து பொதுப்பணித்துறை அதிகாரிகள் தொடா் கண்காணிப்பில் ஈடுபட்டுள்ளனா்.

பேச்சிப்பாறை அணையிலிருந்து தொடா்ந்து 512 கன அடி நீா் உபரியாக வெளியேற்றப்பட்டு வருவதால், கோதையாற்றில் வெள்ளப்பெருக்கு ஏற்பட்டுள்ளது. கரையோரப் பகுதி பொதுமக்கள் பாதுகாப்பான இடங்களுக்கு செல்லுமாறு பொதுப்பணித்துறை அதிகாரிகள் அறிவுறுத்தியுள்ளனா். 48 அடி கொள்ளளவு கொண்ட பேச்சிப்பாறை அணையின் நீா்மட்டம் 45.37 அடியாக உள்ளது, 

அணைக்கு 1235 கன அடி நீா் வந்து கொண்டிருந்தது, அணையிலிருந்து மதகுகள் வழியாக 510 கன அடி நீரும், உபரியாக 512 கன அடி நீரும் வெளியேற்றப்பட்டு வருகிறது. 77 அடி கொள்ளளவு கொண்ட பெருஞ்சாணி அணையின் நீா்மட்டம் 73.76 அடியாக உள்ளது. அணைக்கு 605 கன அடி நீா் வந்து கொண்டிருந்தது,அணையிலிருந்து 250 கன அடி நீா் வெளியேற்றப்படுகிறது.

18 அடி கொள்ளளவு கொண்ட சிற்றாறு 1 அணையின் நீா்மட்டம் 16.40 அடியாக உள்ளது அணைக்கு 130 கன அடி நீா் வந்து கொண்டிருந்தது, அணையிலிருந்து 100 கனஅடி நீா் வெளியேற்றப்படுகிறது. முக்கடல், மற்றும் மாம்பழத்துறையாறு அணைகள் முழுக்கொள்ளளவை எட்டியுள்ளன.