மும்பை மெட்ரோ கட்டுமான விபத்து: ஒருவர் பலி, மூவர் காயம்! காங்கிரஸ் கடும் கண்டனம்

மும்பை முலுண்ட் பகுதியில் இன்று சனிக்கிழமை மதியம் மெட்ரோ ரயில் பாதையின் ஒரு பகுதி இடிந்து விழுந்ததில் ஒருவர் உயிரிழந்தார் மற்றும் மூவர் காயமடைந்தனர். 

எல்.பி.எஸ் சாலையில் உள்ள ஜான்சன் அண்ட் ஜான்சன் தொழிற்சாலைக்கு அருகில் மெட்ரோ மேம்பாலத்தின் பக்கவாட்டுச் சுவர் திடீரென சரிந்து விழுந்ததில், அந்த வழியாகச் சென்ற ஒரு ஆட்டோ ரிக்ஷா மற்றும் கார் ஆகியவை பலத்த சேதமடைந்தன.

இந்த விபத்தில் ராம்தன் யாதவ் என்பவர் உயிரிழந்தார். காயமடைந்தவர்களில் ராஜ்குமார் இந்திரஜித் யாதவ் என்பவரின் நிலைமை கவலைக்கிடமாக உள்ளதால், அவர் அருகில் உள்ள மருத்துவமனையின் தீவிர சிகிச்சைப் பிரிவில் அனுமதிக்கப்பட்டுள்ளார். மற்ற இருவரான மகேந்திர பிரதாப் யாதவ் மற்றும் தீபா ரூஹியா ஆகியோர் தற்போது சீரான நிலையில் சிகிச்சை பெற்று வருகின்றனர்.

சம்பவம் நடந்த இடத்திற்கு விரைந்த மெட்ரோ திட்டக் குழுவினர் மற்றும் பேரிடர் மேலாண்மை அதிகாரிகள், மீட்புப் பணிகளை மேற்கொண்டு வருகின்றனர். விபத்துக்கான சரியான காரணத்தைக் கண்டறிய விசாரணை நடைபெற்று வருவதாக மும்பை பெருநகர பிராந்திய வளர்ச்சி ஆணையம் தெரிவித்துள்ளது. வடாலா முதல் தானே வரையிலான இந்த மெட்ரோ லைன் 4 திட்டப்பணிகள் எல்.பி.எஸ் சாலை வழியாக நடைபெற்று வருவது குறிப்பிடத்தக்கது.

இதற்கிடையில், இந்தச் சம்பவத்திற்கு காங்கிரஸ் எம்.பி வர்ஷா கெய்க்வாட் கடும் கண்டனம் தெரிவித்துள்ளார். உள்கட்டமைப்பு திட்டங்களின் விளம்பரத்தில் காட்டும் ஆர்வத்தை அரசு மக்களின் பாதுகாப்பில் காட்டவில்லை என்றும், மெட்ரோ பணிகளை விரைந்து முடிக்க தரக்கட்டுப்பாட்டில் சமரசம் செய்யப்படுகிறதா என்றும் அவர் கேள்வி எழுப்பியுள்ளார். மேலும், இந்த விபத்திற்கு காரணமானவர்கள் மீது கடுமையான நடவடிக்கை எடுக்கப்பட வேண்டும் என்றும் அவர் வலியுறுத்தியுள்ளார்.