சூர்யா-வின் கருப்பு: காவல் தெய்வத்தின் அதிரடி ஆக்‌ஷன் கமர்ஷியல் விருந்து!

நடிகர் சூர்யா மற்றும் இயக்குனர் ஆர்.ஜே.பாலாஜி கூட்டணியில் பெரும் எதிர்பார்ப்புகளுக்கு மத்தியில் 'கருப்பு' திரைப்படம் வெளியாகி உள்ளது. 

கேரளாவில் இருந்து தனது மகளின் அவசர மருத்துவ ஆபரேஷனுக்காகச் சென்னைக்கு வரும் ஒரு ஏழைத் தந்தை (இந்திரன்ஸ்), எதிர்பாராதவிதமாகத் தான் கொண்டு வந்த நகைகளைத் தொலைக்கிறார். துரிதமாகச் செயல்பட்டுப் போலீசாரிடம் புகார் அளிக்க, அதிர்ஷ்டவசமாக நகையும் மீட்கப்படுகிறது. ஆனால், அந்த நகையை உடனடியாகப் பெற முடியாது என்றும், நீதிமன்ற நடைமுறைகள் மூலமாகத்தான் வாங்க முடியும் என்றும் போலீசார் கைவிரித்து விடுகின்றனர்.

வேறு வழியின்றி நீதிமன்றப் படிக்கட்டுகளை மிதிக்கிறார் இந்திரன்ஸ். இவரது வழக்கை எடுத்து நடத்தும் வக்கீலான ஆர்.ஜே.பாலாஜி, நீதியைத் தள்ளிப்போட்டு, வழக்கை இழுத்தடித்து அவரிடம் தொடர்ந்து பணம் கறக்கிறார். ஏமாற்றத்தின் விளிம்பில் நின்று, இனியும் தனக்கு நீதி கிடைக்காது என்று மனமுடைந்து உடையும் இந்திரன்ஸ், நீதிமன்ற வளாகத்தில் இருக்கும் எல்லைத் தெய்வமான 'கருப்புசாமி' சிலையிடம் தனது வேதனையைக் கொட்டி, மிளகாய் அரைத்துப் பூசி உருகி வேண்டுகிறார்.

அந்த எளியவனின் வேண்டுதலை ஏற்று, ஆக்ரோஷமான 'கருப்புசாமி'யாகவே திரையில் மாஸ் என்ட்ரி தருகிறார் சூர்யா. வக்கீல் ஆர்.ஜே.பாலாஜிக்குத் தகுந்த தண்டனை வழங்கும் போது, "நீதி தெய்வமான நீ முடிந்தால் இந்த ஊழல் நிறைந்த நீதிமன்ற அமைப்பையே மாற்றிக்காட்டு..." என்று சவால் விடப்படுகிறது. இந்தச் சவாலை ஏற்று, நீதிமன்றத்தை முற்றிலும் சீரமைக்க ஒரு சாதாரண மனிதனாகக் களம் இறங்குகிறார் கருப்புசாமி. இந்த அறப்போராட்டச் சவாலில் கருப்புசாமி வெற்றி பெற்றாரா? இல்லையா? என்பதே 'கருப்பு' படத்தின் மீதிக்கதை.

சூர்யா (கருப்புசாமி): கருப்புசாமியாக ஆக்ரோஷமான தெய்வீகப் பார்வை, மனிதனாக வக்கீல் உடையில் நீதிமன்றப் போராட்டம் என இரு வேறு பரிமாணங்களில் மிரட்டியிருக்கிறார். "எல்லாம் என் பேன்ஸுக்காக" என்று அவர் பேசும் வசனங்கள் தியேட்டரை அதிர வைக்கின்றன. கருப்புசாமியாக வரும் காட்சிகளில் எல்லாம் ரசிகர்களுக்குப் புல்லரிக்க வைக்கிறார்.

த்ரிஷா: தனது அசாத்திய அழகாலும், அளவான முதிர்ச்சியான நடிப்பாலும் கவர்கிறார். ஆனால், டப்பிங் பகுதியில் உள்ள சில சொதப்பல்களும், குறைவான திரை நேரமும் சற்று ஏமாற்றம்.

ஆர்.ஜே.பாலாஜி: படத்தின் இயக்குனராக மட்டுமல்லாமல், நெகட்டிவ் ஷேட் கலந்த வில்லத்தனமான வக்கீல் பாத்திரத்தில் புதிய பரிமாணத்தைக் காட்டியுள்ளார். அவரது வழக்கமான டைமிங் காமெடிகளும் ஆங்காங்கே கைகொடுத்துள்ளன.

இந்திரன்ஸின் அனுபவ நடிப்பு திரையில் சோகத்தைக் கடத்துகிறது. இவர்களுடன் நட்டி நடராஜ், சுவாசிகா, ஷிவதா, அனகா மாயா, சுப்ரீத் ரெட்டி, மற்றும் ஜார்ஜ் மரியான் எனப் பெரிய நட்சத்திரப் பட்டாளமே தங்களது பங்களிப்பை நேர்த்தியாக வழங்கியுள்ளனர்.

ஒளிப்பதிவு (ஜி.கே.விஷ்ணு): 'கருப்பு' சாமி வரும் காட்சிகளில் பயன்படுத்தப்பட்டுள்ள ஒளியமைப்பும் கேமரா கோணங்களும் மிரட்டலாக அமைந்துள்ளன.

சாய் அபயங்கர் இசை படத்தின் பின்னணி இசை தியேட்டரில் ரசிகர்களை ஆட்டம் போட வைக்கிறது. குறிப்பாக, சமூக வலைதளங்களில் ட்ரெண்டான 'காட் மோட்...' (God Mode) பாடலுக்குத் தியேட்டரில் நின்றே ரசிகர்கள் 'ஒன்ஸ்மோர்' கேட்கும் அளவிற்கு எனர்ஜி ஏற்றியுள்ளார்.

பலமும் பலவீனமும்:

பலங்கள்: காவல் தெய்வமான கருப்புசாமி பின்னணியில் அமைக்கப்பட்ட மாஸ் ஆக்‌ஷன் காட்சிகள் மற்றும் கமர்ஷியல் எலிமெண்ட்டுகள் படத்திற்குப் பெரும் பலம். "நீதிமன்றத்திற்கு வந்தால் தண்டனை கிடைத்துவிடும் என நம்புகிறோம், ஆனால் நீதிமன்றத்திற்கு வருவதே ஒரு தண்டனைதான்" என்பது போன்ற சமகால யதார்த்தத்தை உரைக்கும் 'நறுக்' வசனங்கள் கவனம் ஈர்க்கின்றன. மேலும், தற்போதைய அரசியல் சூழலுக்கு ஏற்ப முதலமைச்சர் விஜய் பற்றிச் சிலாகித்துக் குறிப்பிடப்படும் காட்சிகளும் தியேட்டரில் பெரும் கைதட்டலைப் பெறுகின்றன.

பலவீனங்கள்: படத்தில் சில இடங்களில் லாஜிக் மீறல்களைத் தவிர்த்திருக்கலாம். எல்லையில் நடக்கும் அத்தனை குற்றங்களையும் தடுத்து நிறுத்தும் தெய்வீகக் கருப்புசாமிக்கு, இத்தனை காலமாகத் தனது கண்முன்னே நீதிமன்ற வளாகத்திற்குள் நடக்கும் அநியாயங்கள் தெரியாமல் போனது ஏனோ? என்ற லாஜிக் கேள்வி எழுகிறது.

இயக்குனர் ஆர்.ஜே.பாலாஜி, மக்கள் நம்பும் காவல் தெய்வக் கோட்பாட்டையும், சமகால நீதிமன்ற அவலங்களையும் மிக நேர்த்தியாக இணைத்து, ரசிகர்களுக்கு ஒரு சிறப்பான கமர்ஷியல் ஆக்சன் விருந்தாகப் படைத்துள்ளார். 'கருப்பு' - குடும்பத்துடன் பார்க்கத்தக்க மாஸ் எண்டர்டெய்னர்!