குலசை முத்தாரம்மன் கோவில் ஆடிக் கொடைவிழா நாளை தொடக்கம்: சிறப்புப் பேருந்துகள் இயக்கம்!

பிரசித்தி பெற்ற குலசேகரன்பட்டினம் அருள்மிகு முத்தாரம்மன் திருக்கோவில் ஆடிக் கொடைவிழா நாளை (திங்கள்கிழமை) தொடங்குவதையொட்டி, பக்தர்களின் வசதிக்காகச் சிறப்புப் பேருந்துகள் இயக்க ஏற்பாடுகள் செய்யப்பட்டுள்ளன.

ஆண்டுதோறும் வெகுவிமர்சையாக நடைபெறும் ஆடிக் கொடைவிழா, நாளை இரவு 9 மணிக்கு மாக்காப்பு தீபாராதனையுடன் தொடங்குவதைத் தொடர்ந்து இரவில் வில்லிசை நடைபெறுகிறது. ஆகஸ்ட் 4 (செவ்வாய்க்கிழமை) காலை 6 மணி, 8 மணி, மாலை 5 மணி மற்றும் இரவு 7 மணிக்குச் சிறப்பு அபிஷேகங்கள் நடைபெறும். காலை 10 மணி மற்றும் இரவு 11 மணிக்குக் கும்பம் திருவீதி உலா நடைபெறும். மதியம் 12 மணி மற்றும் இரவு 7 மணிக்கு அன்னதானமும், இரவு 9 மணிக்குச் சிறப்பு அலங்கார தீபாராதனையும் நடைபெறும்.

ஆகஸ்ட் 5 (புதன்கிழமை): காலை 8 மணி மற்றும் மதியம் 12 மணிக்கு அன்னதானம், பகல் 11:30 மணிக்கு வில்லிசை, இரவு 9 மணிக்குச் சிறப்பு மகுடாட்டம் ஆகியவை நடைபெறும்.மாலை 5 மணிக்கு அம்மன் மஞ்சள் நீராட்டு விழாவும், இரவு 8:30 மணிக்குச் சிறப்பு அபிஷேக ஆராதனைகளும் நடைபெறும்.

விழாவையொட்டி நாளை காலை முதலே தமிழகத்தின் பல்வேறு பகுதிகளில் இருந்தும் ஆயிரக்கணக்கான பக்தர்கள் வருகை தந்து சுவாமி தரிசனம் செய்வார்கள் என எதிர்பார்க்கப்படுகிறது.

பக்தர்களின் வசதிக்காக ஆகஸ்ட் 4-ஆம் தேதி தூத்துக்குடி, நெல்லை, கன்னியாகுமரி மற்றும் தென்காசி ஆகிய மாவட்டங்களில் இருந்து குலசேகரன்பட்டினத்திற்குச் சிறப்புப் பேருந்துகளை இயக்கப் போக்குவரத்துத் துறை நடவடிக்கை எடுத்துள்ளது.

உலகப் புகழ்பெற்ற குலசேகரன்பட்டினம் தசரா திருவிழா வரும் அக்டோபர் மாதம் 11-ஆம் தேதி அதிகாலை 5 மணிக்குக் கொடியேற்றத்துடன் தொடங்குகிறது. திருவிழாவின் முக்கிய நிகழ்வான, சுமார் 20 லட்சம் பக்தர்கள் பங்கேற்கும் மகிஷாசூரசம்ஹாரம் அக்டோபர் 20-ஆம் தேதி நடைபெறவுள்ளது. விழாவிற்கான அனைத்து ஏற்பாடுகளையும் இந்து சமய அறநிலையத் துறை அதிகாரிகள் தீவிரமாகச் செய்து வருகின்றனர்.