பணம் வைத்து சூதாட்டம்: 6பேர் கும்பல் சிக்கியது!

ஆறுமுகநேரி அருகே பணம் வைத்துச் சூதாட்டத்தில் ஈடுபட்ட 6 பேரை காவல் துறையினர் கைது செய்துள்ளனர். அவர்களிடமிருந்து  31,240 ரூபாய் பறிமுதல் செய்யப்பட்டுள்ளது.

தூத்துக்குடி மாவட்டம் ஆறுமுகநேரி மூலக்கரை ரோடு பகுதி கோவில் அருகில் சிலர் சட்டவிரோதமாகப் பணம் வைத்துச் சூதாடுவதாகக் காவல் துறைக்கு ரகசியத் தகவல் கிடைத்தது. அதன் அடிப்படையில் ஆறுமுகநேரி காவல் நிலைய உதவி ஆய்வாளர் இருதயராஜ் தலைமையிலான போலீசார் சம்பவ இடத்திற்குச் சென்று அதிரடி சோதனை நடத்தினர்.

அப்போது அங்குப் பணம் வைத்துச் சூதாட்டத்தில் ஈடுபட்டுக் கொண்டிருந்த குரும்பூர் பகுதியைச் சேர்ந்த முருகன் (39), மாடசாமி (42), ஆறுமுகநேரி பகுதியைச் சேர்ந்த வாசுதேவன் (62), ரெக்ஸ்டன் (31), அழகர் (44) மற்றும் புறா முருகன் (68) ஆகிய 6 பேரைக் காவல் துறையினர் கைது செய்தனர். மேலும், அவர்களிடம் இருந்து சூதாட்டத்திற்குப் பயன்படுத்திய சீட்டுக்கட்டுகள் மற்றும் 31,240 ரூபாய் ரொக்கப் பணத்தை உதவி ஆய்வாளர் இருதயராஜ் பறிமுதல் செய்து வழக்குப் பதிவு செய்துள்ளார்.