தூத்துக்குடியில் ஆக்கிரமிப்பு கட்டிடம் இடித்து அகற்றம் : மாநகராட்சி அதிகாரிகள் நடவடிக்கை!!

தூத்துக்குடியில் விவிடி சிக்னல் பகுதியில் இருந்த ஆக்கிரமிப்பு கட்டிடத்தை  மாநகராட்சி அதிகாரிகள் ஜேசிபி எந்திரம் மூலம் இடித்து அகற்றினர். 

தூத்துக்குடி-பாளையங்கோட்டை ரோட்டில் அண்ணாநகர், பிரையண்ட் நகர் பகுதிகள் சந்திக்கும் இடத்தில் வி.வி.டி. சிக்னல் அமைந்து உள்ளது. இந்த சிக்னல் அருகே அரசு மருத்துவமனையும் அமைந்துள்ளது. இதனால் அந்த பகுதி எப்போதும் போக்குவரத்து நெரிசல் மிகுந்து காணப்படுகிறது. இதன் காரணமாக வாகன ஓட்டிகள், சாலையில் நடந்து செல்லும் பாதசாரிகள் சிரமப்படுகிறார்கள்.

இந்த போக்குவரத்து நெருக்கடிக்கு தீர்வு காண்பதற்காக வி.வி.டி. சிக்னல் பகுதியில் மேம்பாலம் அமைக்க கடந்த சில வருடங்களுக்கு முன்பு தமிழக அரசு முடிவு செய்து அறிவித்தது. ஆஷிஷ்குமார் மாவட்ட ஆட்சியராக இருந்தபோது பல்வேறு ஆக்கிரமிப்பு கட்டிடங்கள் அகற்றப்பட்டது. பின்னர் நீதிமன்ற வழக்குகள் காரணமாக கடந்த 10 ஆண்டுகளுக்கும் மேலாக பல ஆக்கிரமிப்பு கட்டிடங்கள் இடிக்கப்படாமல் இருந்தது. இந்நிலையில் விவிடி சின்னல் பகுதியில் இருந்த தனியாருக்கு சொந்தமான ஆக்கிரமிப்பு கட்டிடத்தை மாநகராட்சி அதிகாரிகள் ஜேசிபி எந்திரம் மூலம் இடித்து அகற்றினர்.