இந்தியாவின் முதல் உள்நாட்டு ஹைட்ரஜன் ரயிலுக்கு ரயில்வே வாரியம் அதிகாரப்பூர்வ ஒப்புதல்!

முற்றிலும் உள்நாட்டிலேயே தயாரிக்கப்பட்ட இந்தியாவின் முதல் ஹைட்ரஜன் எரிபொருள் ரயிலை இயக்குவதற்கு ரயில்வே வாரியம் அதிகாரப்பூர்வமாக ஒப்புதல் அளித்துள்ளது. 

இத்திட்டம் சுற்றுச்சூழல் மாசுபாட்டைக் குறைக்கும் நோக்கில் புதைபடிவ எரிபொருட்களுக்கு மாற்றாகக் கொண்டு வரப்பட்டுள்ளது! இந்திய ரயில்வே துறையில் கார்பன் உமிழ்வை முழுமையாகக் குறைக்கும் நோக்கில், உள்நாட்டுத் தொழில்நுட்பத்தில் தயாரிக்கப்பட்ட முதல் ஹைட்ரஜன் ரயில் பயன்பாட்டிற்கு வரவுள்ளது.

இயங்கும் தொழில்நுட்பம்: இந்த ரயில் வழக்கமான டீசல் என்ஜின்களைப் போலக் கரும்புகையையோ, நச்சு வாயுக்களையோ வெளியேற்றாது. ஹைட்ரஜன் மற்றும் ஆக்சிஜன் இணையும் போது ஏற்படும் வேதியியல் எதிர்வினை மூலம் மின்சாரம் தயாரிக்கப்பட்டு இது இயக்கப்படுகிறது. இதனால், இதிலிருந்து புகைக்குப் பதிலாகச் சுத்தமான நீராவி மட்டுமே உபவிளைபொருளாக வெளியேறும். இந்த ரயில் சக்திவாய்ந்த 1200 கிலோவாட் என்ஜின் மூலம் இயக்கப்படுகிறது.

வேகம் மற்றும் வழித்தடம்: முதற்கட்டமாக வடமேற்கு ரயில்வே மண்டலத்தின் கீழ், ஹரியானா மாநிலத்தின் ஜிந்த் - சோனிபட் இடையேயான வழித்தடத்தில் இந்த ரயில் இயக்கப்பட உள்ளது. மொத்தம் 10 பெட்டிகளைக் கொண்ட இந்த ரயில் அதிகபட்சமாக மணிக்கு 75 கிலோமீட்டர் வேகத்தில் இயங்கும்.

இந்த ரயிலுக்கான பிரத்யேக ஹைட்ரஜன் வாயு சேமிப்பு மற்றும் நிரப்பும் நிலையம் ஹரியானாவின் ஜிந்த் பகுதியில் அமைக்கப்பட்டுள்ளது. இந்த எரிபொருள் நிலையத்திற்கு மத்திய அரசின் வெடிபொருள் பாதுகாப்பு அமைப்பான பெசோ (PESO) அதிகாரப்பூர்வமாக உரிமம் வழங்கியுள்ளது. மேலும், இந்த ரயிலை முறையாகப் பராமரிப்பதற்காக டெல்லியில் உள்ள சாகுர்பஸ்தி பகுதியில் பிரத்யேக மையம் அமைக்கப்பட்டு, அங்குப் பாதுகாப்புத் தணிக்கைகள் மேற்கொள்ளப்படவுள்ளன.

இந்திய அரசின் ‘தேசிய பசுமை ஹைட்ரஜன் திட்டத்தின்’ ஒரு பகுதியாக இந்த ரயில் அறிமுகப்படுத்தப்படுகிறது. வரும் 2070 ஆம் ஆண்டிற்குள் கார்பன் உமிழ்வே இல்லாத நாடாக இந்தியாவை மாற்றுவதை இலக்காகக் கொண்டு இத்திட்டம் செயல்படுத்தப்படுகிறது.