டாக்டரின் பரிந்துரைச் சீட்டு இல்லாமல் இருமல் மருந்து வாங்க முடியாது: மத்திய அரசு அதிரடி

பொதுவாகப் பயன்படுத்தப்படும் இருமல் மருந்துகள் உள்ளிட்ட 'சிரப்' (Syrup) வகை திரவ மருந்துகளை, இனி அங்கீகரிக்கப்பட்ட மருத்துவரின் பரிந்துரைச் சீட்டு (Prescription) இல்லாமல் நுகர்வோர் நேரடியாக மருந்தகங்களில் வாங்க முடியாது என்று மத்திய அரசு விதிகளைக் கடுமையாக்கி அதிரடி உத்தரவு பிறப்பித்துள்ளது.

மத்திய அரசு கொண்டு வந்துள்ள இந்த புதிய ‘மருந்துகள் (5-வது திருத்த) விதிகள், 2026’ மூலமாக இந்த வரலாற்றுச் சிறப்புமிக்க மாற்றம் நடைமுறைக்கு வந்துள்ளது. 1945-ஆம் ஆண்டு மருந்து விதிகளில் கொண்டுவரப்பட்ட புதிய திருத்தத்தின்படி, இருமல் மருந்துகள் உள்ளிட்ட சிரப்களின் விற்பனையைக் கட்டுப்படுத்தும் விதிகள் நாடு முழுவதும் உடனடியாகக் கடுமையாக்கப்பட்டுள்ளன.

கடந்த சில மாதங்களுக்கு முன்னர் மத்தியப் பிரதேசம் மற்றும் ராஜஸ்தான் ஆகிய மாநிலங்களில் கலப்படம் செய்யப்பட்ட இருமல் மருந்துகளால் (சிரப்) குழந்தைகள் உயிரிழந்த சோகமான சம்பவங்கள் அரங்கேறின. இந்த விபரீத நடவடிக்கையைத் தொடர்ந்து, கடந்த ஆண்டு டிசம்பரில் வெளியிடப்பட்ட வரைவு முன்மொழிவு மீதான பொதுமக்களின் கருத்துக்களைப் பரிசீலித்த பின்னர், கடந்த ஜூன் 9, 2026 தேதியிட்ட அதிகாரப்பூர்வ அறிவிப்பை மத்திய அரசு வெளியிட்டுள்ளது.

மத்திய அரசின் புதிய அறிவிப்பின்படி, இதுவரை வீட்டு உபயோக சாதாரண மருத்துவப் பொருட்களின் வரிசையில் இடம் பெற்றிருந்த 'சிரப்ஸ்' (Syrups) என்ற வார்த்தை மருந்து விதிகளிலிருந்து அதிகாரப்பூர்வமாக நீக்கப்பட்டுள்ளது. இதன் மூலம், இதுவரை எவ்விதக் கட்டுப்பாடும் இன்றி விற்கப்பட்டு வந்த திரவ மருந்துகள் அனைத்தும், தற்போது கடுமையான மருந்து ஒழுங்குமுறைப் பட்டியலின் கீழ் கொண்டு வரப்பட்டுள்ளன.

மருந்துகள் தொழில்நுட்ப ஆலோசனைக் குழுவுடன் (DTAB) கலந்தாலோசித்து, மருந்துகள் மற்றும் அழகுசாதனப் பொருட்கள் சட்டம், 1940-இன் பிரிவுகள் 12 மற்றும் 33-இன் கீழ் வழங்கப்பட்டுள்ள அதிகாரங்களைப் பயன்படுத்தி இந்த இறுதி அறிவிப்பை மத்திய அரசு வெளியிட்டுள்ளது.

இந்த ஒழுங்குமுறை மாற்றத்தின்படி, நுகர்வோர் மருந்தகங்களிலிருந்து இருமல் மற்றும் திரவ மருந்துகளை வாங்குவதற்கு முன்பு, பதிவுசெய்யப்பட்ட ஒரு டாக்டரால் வழங்கப்பட்ட தகுந்த மருந்துச் சீட்டை (Prescription) கட்டாயம் சமர்ப்பிக்க வேண்டும். முன்பு மருந்தகங்களில் நேரடியாகக் கிடைத்து வந்த இருமல் மற்றும் பிற திரவ மருந்துகளின் வழக்கமான கொள்முதல்களை இந்த அதிரடி நடவடிக்கை நேரடியாகப் பாதிக்கும் என்று எதிர்பார்க்கப்படுகிறது.

இது தொடர்பான முக்கிய அறிவிப்பை, மத்திய சுகாதாரம் மற்றும் குடும்ப நலத்துறை இணை செயலாளர் ஹர்ஷ் மங்களா வெளியிட்டுள்ளார். தற்போது இந்த புதிய சட்டத் திருத்தம் உடனடியாக அமலுக்கு வந்துள்ளதால், நாடு முழுவதும் உள்ள அனைத்து மருந்தகங்களும், இருமல் மருந்துகள் மற்றும் அது தொடர்பான தயாரிப்புகளின் விற்பனையைக் கட்டுப்படுத்தும் திருத்தப்பட்ட விதிகளுக்குக் கண்டிப்பாக இணங்கி நடக்க வேண்டும் என்று மத்திய அரசு உத்தரவிட்டுள்ளது.