அம்மிக்கல்லால் தாக்கி கல்லூரிப் பேராசிரியை கொடூர கொலை - மகன் வெறிச்செயல்!

தூத்துக்குடி மாவட்டம் திருச்செந்தூர் அருகே உள்ள குமாரபுரம் ஜெயா நகரைச் சேர்ந்தவர் அன்புமணி. இவரது மனைவி ரேணுகா (62), ஓய்வுபெற்ற கல்லூரிப் பேராசிரியை. இவர்களுக்கு இரண்டு மகன்கள் உள்ளனர். மூத்த மகன் சென்னையில் காவல்துறையில் பணியாற்றுகிறார். இளைய மகன் தங்க பாலன் (27). இவர் மனநலம் பாதிக்கப்பட்டு கடந்த 3 ஆண்டுகளாகச் சிகிச்சை பெற்று வருகிறார்.

நேற்று வெள்ளிக்கிழமை காலை அன்புமணி பள்ளத்தூர் கிராமத்தில் உள்ள தனது குலதெய்வ கோவிலுக்குச் சென்றிருந்தார். அப்போது வீட்டில் தாயுடன் தனியாக இருந்த தங்க பாலன், திடீரென வீட்லிருந்த அம்மிக்கல்லை எடுத்துத் தாய் ரேணுகாவின் தலையில் அடித்துக் கொடூரமாகக் கொலை செய்தார். மேலும் இச்சம்பவத்தைச் தனது அண்ணனுக்கு வாட்ஸ்அப்பில் புகைப்படமாக எடுத்து அனுப்பி அதிர்ச்சி ஏற்படுத்தியுள்ளார்.

தகவலறிந்து சம்பவ இடத்திற்கு வந்த திருச்செந்தூர் தாலுகா காவல்துறையினர், உயிரிழந்த ரேணுகாவின் சடலத்தைக் கைப்பற்றிப் பிரேத பரிசோதனைக்காகத் திருச்செந்தூர் அரசு மருத்துவமனைக்கு அனுப்பி வைத்தனர். கைது செய்யப்பட்ட தங்க பாலன் தற்போது அரசு மருத்துவமனையில் காவல் துறையினரின் கண்காணிப்பில் சிகிச்சையில் வைக்கப்பட்டுள்ளார். இச்சம்பவம் அப்பகுதியில் பெரும் சோகத்தையும் அதிர்ச்சியையும் ஏற்படுத்தியுள்ளது.