ரயில்வே மின்பாதை பராமரிப்பில் புதிய மைல்கல் : நாசரேத்தில் சிறப்பு ரயில் பெட்டி அறிமுகம்!

மதுரை கோட்டத்தில் ரயில் பாதைகள் 100 சதவீதம் மின்மயமாக்கப்பட்டுள்ள நிலையில், மின் கம்பிகளைப் பராமரிக்கவும் பழுதுகளை உடனுக்குடன் சரி செய்யவும் அதிநவீன வசதிகளுடன் கூடிய சிறப்பு ரயில் பெட்டிகள் அறிமுகம் செய்யப்பட்டுள்ளன.

இந்தச் சிறப்பு ரயில் பெட்டி ஒரு சிறிய நடமாடும் பணிமனை போல வடிவமைக்கப்பட்டுள்ளது. இதில் மின்சார கம்பி வடம் அருகே சென்று பழுது பார்க்கத் தானாக உயரும் லிப்ட் வசதி. பராமரிப்பு பணிகளுக்காகப் பெட்டியிலேயே ஜெனரேட்டர் வசதி செய்யப்பட்டுள்ளது. பழுதுகளைச் சரி செய்யத் தேவையான அனைத்து நவீனக் கருவிகளும் இதில் இடம்பெற்றுள்ளன.

தூத்துக்குடி மாவட்டம் நாசரேத் ரயில் நிலையத்தில் இந்த வசதி தொடங்கி வைக்கப்பட்டது. தற்போது 18 சிறப்புப் பெட்டிகள் தயார் நிலையில் உள்ளன. மணப்பாறை, திண்டுக்கல், மதுரை, விருதுநகர், கோவில்பட்டி, பழனி, காரைக்குடி, ராஜபாளையம், ராமநாதபுரம் ஆகிய நிலையங்களில் இதற்கெனத் தனிப் பாதை அமைக்கப்பட்டு இவை தயார் நிலையில் நிறுத்தப்பட்டுள்ளன.

மானாமதுரை, தேனி, நெல்லை, தூத்துக்குடி, செங்கோட்டை, புனலூர் ஆகிய நிலையங்களில் இந்த வசதி விரைவில் அறிமுகம் செய்யப்பட உள்ளது. ரயில் பாதைக்கு அருகே 2 மீட்டர் தூரத்தில் வளர்ந்துள்ள மரங்களால் மின் கம்பிகள் பாதிக்கப்பட வாய்ப்புள்ளது. எனவே, ரயில் பாதை அருகே ஆபத்தான நிலையில் உள்ள மரங்கள் குறித்துத் தகவல் தெரிந்தால், உடனடியாக அருகில் உள்ள ரயில் நிலைய அதிகாரி அல்லது கேட் பாதுகாவலரிடம் தெரிவிக்குமாறு தெற்கு ரயில்வே கேட்டுக்கொண்டுள்ளது.