அனைத்து ரயில் நிலையங்களிலும் பாரத் டாக்ஸி சேவை : மத்திய அரசுக்கு கோரிக்கை

மத்திய அரசின் ‘சககார் சே சம்ரித்தி’ (கூட்டுறவு மூலம் வளம்) தொலைநோக்குப் பார்வையின் கீழ், பன்மாநில கூட்டுறவு சங்கங்கள் சட்டத்தின் கீழ் பதிவு செய்யப்பட்டு, 8 தேசிய அளவிலான கூட்டுறவு நிறுவனங்களின் ஆதரவோடு பாரத் டாக்ஸி தொடங்கப்பட்டது.

தற்போது ரயில் நிலையங்களில் உள்ள முற்றுரிமை பெற்ற உள்ளூர் ஆட்டோ மற்றும் டாக்ஸி கூட்டமைப்புகளால் பயணிகள் கடும் சுரண்டலுக்கு ஆளாகி வருகின்றனர். இப்பாதிப்பை நீக்க, அகில இந்திய அளவில் உள்ள அனைத்துப் பிரிவுகளைச் சேர்ந்த ரயில் நிலையங்களிலும் பாரத் டாக்ஸி முறையைக் கட்டாயமாக்க வேண்டும் என அந்த முன்மொழிவில் கோரப்பட்டுள்ளது. 

மேலும், பழைய டாக்ஸி ஸ்டாண்டுகளை அகற்றிவிட்டு, தொழில்நுட்பம் சார்ந்த பிரத்யேக 'பாரத் டாக்ஸி பிக்-அப்' மண்டலங்களை உருவாக்க வேண்டும் எனவும், பயணிகள் மிக எளிதாகவும், வெளிப்படையான கட்டணத்திலும் பயணங்களை முன்பதிவு செய்ய ஏதுவாக, பாரத் டாக்ஸி சேவையை ஐஆர்சிடிசி (IRCTC) இணையதளம் மற்றும் செயலியுடன் நேரடியாக ஒருங்கிணைக்க வேண்டும் எனவும் பரிந்துரைக்கப்பட்டுள்ளது.

இதற்கிடையே, நாடாளுமன்ற மக்களவையில் பாரத் டாக்ஸியின் செயல்பாடுகள் குறித்து மத்திய உள்துறை மற்றும் கூட்டுறவுத்துறை அமைச்சர் அமித் ஷா எழுத்துப்பூர்வமாகப் பதிலளித்துள்ளார். 'சாரதியே முதலாளி' என்ற கொள்கையின்படி, தனியார் நிறுவனங்களைப் போல ஓட்டுநர்களைச் சுரண்டாமல், அவர்களை இந்த கூட்டுறவு அமைப்பின் பங்குதாரர்களாகவும், உரிமையாளர்களாகவும் மாற்றுவதே இத்திட்டத்தின் நோக்கம் என்று அவர் குறிப்பிட்டுள்ளார்.

இத்தளத்தில் ஓட்டுநர்களிடமிருந்தோ அல்லது வாடிக்கையாளர்களிடமிருந்தோ எந்தவொரு கமிஷன் தொகையோ அல்லது கூடுதல் தளக் கட்டணமோ (Platform fees) வசூலிக்கப்படுவதில்லை என்பதால், இதனால் கிடைக்கும் லாபம் நேரடியாக ஓட்டுநர்களுக்கே சென்றடைகிறது. எனினும், விமான நிலைய முன்கூட்டிய கட்டண பூத்களில் மட்டும் செயல்பாட்டுச் செலவுகளுக்காக 7% சேவை வரி விதிக்கப்படுகிறது.

தேசிய அளவில் தொடங்கப்பட்ட வெறும் 5 மாதங்களுக்குள், நாடு முழுவதும் 7 லட்சத்திற்கும் அதிகமான ஓட்டுநர்களும் மற்றும் 37 லட்சத்திற்கும் அதிகமான வாடிக்கையாளர்களும் இதில் இணைந்துள்ளனர். தற்போது டெல்லி என்.சி.ஆர் மற்றும் குஜராத்தின் 14 முக்கிய நகரங்களில் இச்சேவை வெற்றிகரமாக இயங்கி வருகிறது.

பெண் ஓட்டுநர்களுக்கு வேலைவாய்ப்பை வழங்கவும், பெண் பயணிகளின் பாதுகாப்பை உறுதி செய்யவும் தொடங்கப்பட்ட "பைக் தீதி” (Bike Didi) திட்டத்தின் கீழ் 150-க்கும் மேற்பட்ட பெண் ஓட்டுநர்கள் ஏற்கனவே இணைந்துள்ளனர். மேலும் ஓட்டுநர்களுக்கு மருத்துவக் காப்பீடு, விபத்துக் காப்பீடு, ஓய்வூதியச் சேமிப்பு மற்றும் 24 மணி நேர உதவி மையங்கள் மூலம் முழு சமூகப் பாதுகாப்பு வழங்கப்படுகிறது.

தற்போது முதற்கட்டமாகச் செயல்பட்டு வரும் பாரத் டாக்ஸி சேவை, வரும் 2029-ஆம் ஆண்டிற்குள் கட்டம் கட்டமாக இந்தியாவின் அனைத்து மாநிலங்கள் மற்றும் நகரங்களுக்கும் விரிவுபடுத்தப்பட்டு, தேசிய டிஜிட்டல் பொது உள்கட்டமைப்போடு முழுமையாக ஒருங்கிணைக்கப்படும் என்று அமைச்சர் அமித் ஷா தெரிவித்துள்ளார்.