8-ஆம் வகுப்பு பாடப்புத்தகத்தில் நீதித்துறை குறித்து சர்ச்சை: மன்னிப்பு கோரியது என்.சி.இ.ஆர்.டி.!

தேசிய கல்வி ஆராய்ச்சி மற்றும் பயிற்சி கவுன்சில் (NCERT) வெளியிட்டுள்ள 8-ஆம் வகுப்பு சமூக அறிவியல் பாடப்புத்தகத்தில், நீதித்துறை குறித்து இடம்பெற்ற சர்ச்சைக்குரிய கருத்துகளுக்காக அந்த நிறுவனம் இன்று நிபந்தனையற்ற பொது மன்னிப்பு கோரியுள்ளது.

புதிதாக அச்சடிக்கப்பட்ட 8-ஆம் வகுப்பு சமூக அறிவியல் புத்தகத்தில், 'நீதித்துறையில் ஊழல்' என்ற தலைப்பில் இடம்பெற்றிருந்த கருத்துகள் பெரும் விவாதத்தை ஏற்படுத்தின. இந்த விவகாரத்தைக் கடந்த பிப்ரவரி 26-ஆம் தேதி உச்ச நீதிமன்றம் (Supreme Court) தாமாக முன்வந்து விசாரணைக்கு எடுத்துக்கொண்டது.

விசாரணையின் போது, அந்தப் பாடப்பிரிவில் உள்ள கருத்துகளுக்குக் கடும் ஆட்சேபம் தெரிவித்த நீதிபதிகள், இது நீதித்துறைக்கு எதிராகத் திட்டமிட்டுச் செய்யப்பட்ட சதி என்று கண்டனம் தெரிவித்தனர். இதனைத் தொடர்ந்து, உச்ச நீதிமன்றத் தலைமை நீதிபதி தலைமையிலான அமர்வு பின்வரும் உத்தரவுகளைப் பிறப்பித்தது:

சர்ச்சைக்குரிய அந்தச் சமூக அறிவியல் புத்தகத்தை மேற்கொண்டு அச்சடிக்கவோ, வெளியிடவோ கூடாது. புத்தகத்தில் உள்ள ஆட்சேபனைக்குரிய பகுதிகளைப் பொதுவெளியில் பகிரத் தடை விதிக்கப்படுகிறது. இது தொடர்பாக விளக்கம் அளிக்க என்.சி.இ.ஆர்.டி. (NCERT) இயக்குநர் மற்றும் பள்ளிக்கல்வித் துறைச் செயலாளருக்கு நோட்டீஸ் அனுப்பப்பட்டது.

நீதிமன்றத்தின் பிடி இறுகியதைத் தொடர்ந்து, என்.சி.இ.ஆர்.டி. நிர்வாக இயக்குநர் மற்றும் உறுப்பினர்கள் இன்று அறிக்கை ஒன்றை வெளியிட்டுள்ளனர். அதில் கூறப்பட்டுள்ளதாவது: "இந்த விவகாரம் தொடர்பாக நாங்கள் நிபந்தனையற்ற பொது மன்னிப்புக் கோருகிறோம். சர்ச்சைக்குரிய அந்தப் புத்தகம் சந்தையிலிருந்து முழுமையாகத் திரும்பப் பெறப்படும். இனி அந்தப் புத்தகம் விற்பனைக்குக் கிடைக்காது என்பதை உறுதி செய்கிறோம்." இவ்வாறு அந்த அறிக்கையில் தெரிவிக்கப்பட்டுள்ளது.