இன்று வானில் அரிய நிகழ்வு: ரத்த நிலவை வெறும் கண்களால் பார்க்கலாமா?

இந்த ஆண்டின் முதல் முழு சந்திர கிரகணம் இன்று (மார்ச் 3) மாலை நிகழ உள்ளது. சூரியனுக்கும் சந்திரனுக்கும் இடையில் பூமி வரும்போது, பூமியின் நிழல் சந்திரனை மறைப்பதையே நாம் சந்திர கிரகணம் என்கிறோம்.

கிரகணத்தின் போது சூரிய ஒளி பூமியின் வளிமண்டலத்தைக் கடந்து சந்திரனின் மீது படுகிறது. வளிமண்டலத்தில் ஒளிச்சிதறல் ஏற்படுவதால் சந்திரன் சிவப்பு நிறத்தில் காட்சியளிக்கிறது. இதனை வானியல் அறிஞர்கள் 'ரத்த நிலவு' (Blood Moon) என்று அழைக்கின்றனர்.
கிரகண நேரம் (இந்திய நேரப்படி):

முழு கிரகண நிலை சுமார் 58 நிமிடங்கள் நீடிக்கும்.

நிழல் கிரகணம் தொடக்கம்: மாலை 4:58 மணி

முழு கிரகணம் நிறைவு: மாலை 5:32 மணி

கிரகணம் முழுமையாக முடிவடையும் நேரம்: இரவு 7:53 மணி

இந்தியாவில் எங்குத் தெரியும்?

இந்தியாவில் சந்திரன் உதிக்கும் போதே கிரகணம் தொடங்கிவிடுவதால், நாட்டின் பெரும்பாலான பகுதிகளில் கிரகணத்தின் இறுதி நிலையை மட்டுமே காண முடியும்.

வடகிழக்கு மாநிலங்கள்: அசாம், அருணாச்சல பிரதேசம் மற்றும் மேற்கு வங்காளத்தில் சந்திரன் சீக்கிரமே உதயமாகும் என்பதால், அங்கு முழு கிரகணத்தையும் காண முடியும். மாலை 5:10 முதல் 5:25 மணிக்குள் கிரகணத்தின் உச்சக்கட்ட நிலையைத் தெளிவாகக் காணலாம்.

சென்னை, பெங்களூரு, மும்பை மற்றும் டெல்லி போன்ற நகரங்களில் மாலை 6:20 முதல் 6:30 மணிக்குள் பகுதி அளவிலான கிரகணத்தைக் காணலாம். சந்திரன் உதிக்கும் போது கிழக்கு அடிவானத்தில் தாழ்வாக இது தெரியும்.

சூரிய கிரகணத்தைப் போலன்றி, சந்திர கிரகணத்தை வெறும் கண்களால் பார்ப்பது முற்றிலும் பாதுகாப்பானது. இதைப் பார்ப்பதற்குச் சிறப்புப் பாதுகாப்பு கண்ணாடிகள் எதுவும் தேவையில்லை.