எம்.எல்.ஏ.க்கள் பேரம், உளவுத்துறை அச்சுறுத்தல் : ஆளுநரைச் சந்தித்து திமுக பிரதிநிதிகள் புகார்!

தமிழகத்தில் த.வெ.க. ஆட்சியை  கவிழ்க்க 180 கோடியில் சதித்திட்டம் தீட்டப்பட்டதாக எழுந்துள்ள குற்றச்சாட்டுகளின் பின்னணியில், திமுகவைச் சேர்ந்த முக்கியப் பிரதிநிதிகள் இன்று தமிழ்நாடு ஆளுநரை நேரில் சந்தித்து, அவசர அரசியலமைப்பு ரீதியான தலையீட்டைக் கோரி முக்கிய மனு ஒன்றை அளித்துள்ளனர்.

திமுகவைச் சேர்ந்த ஆர்.எஸ்.பாரதி, பி.வில்சன், எஸ்.ஆஸ்டின் மற்றும் ஐ.பரந்தாமன் ஆகியோர் இன்று ஆளுநரைச் சந்தித்து இந்த மனுவை முறைப்படி ஒப்படைத்தனர். காவல்துறையினரைச் சில குறிப்பிட்ட அரசியல் சக்திகள் தவறாகப் பயன்படுத்தி, மக்களால் தேர்ந்தெடுக்கப்பட்ட மக்கள் பிரதிநிதிகளைச் சட்டவிரோதமாகக் கைது செய்வதாகவும், அவர்களைக் காவலில் வைத்துத் துன்புறுத்தி, கட்டாயப்படுத்தி கட்சி மாறத் தூண்டுவதாகவும் அந்த மனுவில் மிகக் கடுமையான கவலைகள் தெரிவிக்கப்பட்டுள்ளன.

மேலும், தமிழகத்தில் தற்போது நிலவி வரும் அசாதாரண அரசியல் சூழலில், சட்டமன்ற உறுப்பினர்கள் கட்சி மாறுவதற்காகப் பல்வேறு சலுகைகள் மற்றும் கோடிக்கணக்கான ரூபாய் பணம் வழங்குவதாகக் கூறப்படும் குற்றச்சாட்டுகள் குறித்தும் ஆளுநரின் கவனத்திற்கு திமுக கொண்டு சென்றுள்ளது. அத்துடன், அதிகாரப்பூர்வமான அரசு நிகழ்வுகளில் எவ்வித பொறுப்பிலும் இல்லாத தகுதியற்ற அங்கீகரிக்கப்படாத நபர்கள் பங்கேற்பது குறித்தும், அது உத்தியோகபூர்வ நடைமுறைகளை மீறுவதாகவும் அந்த மனுவில் சுட்டிக்காட்டப்பட்டுள்ளது.

ஜனநாயக அமைப்புகளைச் சீர்குலைவில் இருந்து பாதுகாத்திட ஆளுநர் தனது அரசியலமைப்பு அதிகாரங்களைப் பயன்படுத்தி உடனடியாக இதில் தலையிட வேண்டும் என்றும், சுதந்திரமான விசாரணை நடத்தித் தகுந்த சட்ட நடவடிக்கை எடுத்திட வேண்டும் என்றும் திமுக பிரதிநிதிகள் அந்த மனுவின் வாயிலாகத் திட்டவட்டமாக வலியுறுத்தியுள்ளனர்.