விஜய்க்கு சி.வி. சண்முகம் அணியினர் ஆதரவு : அதிமுகவில் பிளவு - கட்சித்தலைமை கண்டனம்!

தமிழக முதலமைச்சராகப் பொறுப்பேற்றுள்ள ஜோசப் விஜய், இன்று அதிமுக முன்னாள் அமைச்சர் சி.வி.சண்முகம் மற்றும் அவரது ஆதரவு முன்னாள் அமைச்சர்களை நேரில் சந்தித்துப் பேசியது, அதிமுகவில் அதிகாரப்பூர்வப் பிளவை உறுதி செய்துள்ளதுடன் அரசியல் சலசலப்பையும் அதிகரித்துள்ளது.

சென்னை எம்.ஆர்.சி நகரில் உள்ள சி.வி.சண்முகத்தின் அலுவலகத்திற்கு இன்று முதலமைச்சர் விஜய் நேரில் சென்றார். அங்கு அவருக்கு அதிமுக முன்னாள் அமைச்சர்கள் எஸ்.பி. வேலுமணி, நத்தம் விஸ்வநாதன், சி. விஜயபாஸ்கர், கே.பி. அன்பழகன், இரா. காமராஜ் மற்றும் 30-க்கும் மேற்பட்ட எம்.எல்.ஏ-க்கள் உற்சாக வரவேற்பு அளித்தனர். பரஸ்பரம் பூங்கொத்து கொடுத்து வாழ்த்துகளைப் பகிர்ந்து கொண்டனர்.

நடந்து முடிந்த சட்டமன்றத் தேர்தலில் 47 இடங்களில் மட்டுமே வென்ற அதிமுக, தற்போது இரண்டு அணிகளாகச் செயல்படுகிறது:

எடப்பாடி பழனிசாமி அணி: 17 எம்.எல்.ஏ-க்களின் ஆதரவு.

வேலுமணி - சி.வி.சண்முகம் அணி: 30 எம்.எல்.ஏ-க்களின் ஆதரவு.

செய்தியாளர்களிடம் பேசிய சி.வி.சண்முகம், எடப்பாடி பழனிசாமி மீது அடுக்கடுக்கான குற்றச்சாட்டுகளை முன்வைத்தார்: தேர்தலுக்குப் பிறகு திமுக ஆதரவோடு ஆட்சி அமைக்கலாம் எனப் பழனிசாமி கூறியதை அதிமுக எம்.எல்.ஏ-க்கள் யாரும் ஏற்கவில்லை.அதிமுக காப்பாற்றப்பட வேண்டும்; புதிய கூட்டணி அமைக்கப்பட வேண்டும் என்பதே பெரும்பான்மை உறுப்பினர்களின் விருப்பம். மக்கள் தீர்ப்பை மதித்து, முதலமைச்சர் விஜய் தலைமையிலான தமிழக வெற்றிக் கழக அரசுக்கு நாங்கள் முழு ஆதரவை அளிக்கிறோம் என்றார்..

சி.வி.சண்முகம் அணியின் இந்த முடிவுக்கு எடப்பாடி பழனிசாமி தரப்பு கடும் கண்டனம் தெரிவித்துள்ளது. தவெக-விடம் அமைச்சர் பதவிக்காக மண்டியிட்டுக் கிடக்கிறீர்களா? என அதிமுக தலைமை கேள்வி எழுப்பியுள்ளதுடன், திமுக-அதிமுக கூட்டணி என்பது வெறும் ஊடக வதந்தி என்றும் விளக்கம் அளித்துள்ளது.

சட்டப்பேரவையில் நாளை (மே 13) முதலமைச்சர் விஜய் தனது பெரும்பான்மையை நிரூபிக்க உள்ளார். ஏற்கனவே மன்னார்குடி எம்.எல்.ஏ காமராஜ் ஆதரவு தெரிவித்துள்ள நிலையில், தற்போது சி.வி.சண்முகம் அணியின் 30 எம்.எல்.ஏ-க்களும் ஆதரவு அளித்துள்ளதால், விஜய் தலைமையிலான அரசு மிக எளிதாகப் பெரும்பான்மையை நிரூபிக்கும் என்பது உறுதியாகியுள்ளது.