ஸ்டாலின் - ரஜினி சந்திப்பில் அரசியல் இல்லை: ரஜினியின் பி.ஆர்.ஓ விளக்கம்!

தேர்தல் முடிவுகளுக்குப் பிறகு, திமுக தலைவர் மு.க. ஸ்டாலினை நடிகர் ரஜினிகாந்த் நேரில் சந்தித்தது குறித்துப் பரவி வந்த அரசியல் வதந்திகளுக்கு ரஜினி தரப்பு அதிகாரப்பூர்வமாக விளக்கம் அளித்துள்ளது.

தமிழகத்தில் நடந்து முடிந்த சட்டப்பேரவைத் தேர்தலில் ஆட்சி மாற்றம் ஏற்பட்டுள்ள சூழலில், நடிகர் ரஜினிகாந்த் முன்னாள் முதலமைச்சர் மு.க. ஸ்டாலினை அவரது இல்லத்தில் நேரில் சந்தித்துப் பேசினார். தேர்தல் முடிவுகளுக்குப் பிந்தைய இந்தச் சந்திப்பு, அரசியல் வட்டாரத்தில் பல்வேறு விவாதங்களையும் யூகங்களையும் கிளப்பியது.

இந்நிலையில், இந்தச் சந்திப்பு குறித்து ரஜினிகாந்தின் மக்கள் தொடர்பாளர் (P.R.O) தனது எக்ஸ் (X) தளத்தில் விளக்கமளித்துள்ளார். அதில் அவர் குறிப்பிட்டிருப்பதாவது: "நடிகர் ரஜினிகாந்தும், திரு. மு.க. ஸ்டாலினும் கடந்த 42 ஆண்டுகால நெருங்கிய நண்பர்கள். இந்தச் சந்திப்பு முற்றிலும் நட்பு ரீதியானது மட்டுமே. இதில் எவ்வித அரசியல் உள்நோக்கமும் இல்லை.

ஊடகங்கள் இந்தச் சந்திப்பைத் தேவையில்லாமல் அரசியலோடு தொடர்புபடுத்தி வதந்திகளைப் பரப்ப வேண்டாம் எனத் தாழ்மையுடன் கேட்டுக்கொள்கிறேன்." எனத் தெரிவிக்கபட்டுள்ளது.  இந்த விளக்கத்தின் மூலம், ரஜினிகாந்த் - ஸ்டாலின் சந்திப்பு என்பது வெறும் நலம் விசாரிப்பு மற்றும் நட்பு ரீதியானது என்பது உறுதி செய்யப்பட்டுள்ளது. இருப்பினும், தமிழக அரசியலில் ஏற்பட்டுள்ள புதிய மாற்றங்களுக்கு இடையே இந்தச் சந்திப்பு முக்கியத்துவம் வாய்ந்ததாகப் பார்க்கப்படுகிறது.