எடப்பாடியாருக்கு தூத்துக்குடி அதிமுக முழு ஆதரவு: எஸ்.பி. சண்முகநாதன் தலைமையில் தீர்மானம்!

அனைத்திந்திய அண்ணா திராவிட முன்னேற்றக் கழகத்தின் பொதுச்செயலாளராக எடப்பாடி கே.பழனிசாமியே தொடர்ந்து நீடிக்க வேண்டும் என வலியுறுத்தி, தூத்துக்குடி தெற்கு மாவட்ட அதிமுக நிர்வாகிகள் ஆலோசனை கூட்டத்தில் தீர்மானம் நிறைவேற்றப்பட்டுள்ளது.

சட்டமன்றத் தேர்தல் முடிவுகளுக்குப் பிந்தைய அரசியல் சூழ்நிலைகள் குறித்து விவாதிப்பதற்காக, தூத்துக்குடி தெற்கு மாவட்ட அதிமுக நிர்வாகிகள் மற்றும் சார்பு அணி நிர்வாகிகளின் அவசர ஆலோசனைக் கூட்டம் மாவட்டக் கழக அலுவலகத்தில் நடைபெற்றது. இக்கூட்டத்திற்கு அதிமுக தெற்கு மாவட்டக் கழகச் செயலாளரும், முன்னாள் அமைச்சருமான  எஸ்.பி. சண்முகநாதன் தலைமை தாங்கினார்.

கூட்டத்தில், எடப்பாடி கே.பழனிசாமியின் ஒற்றைத் தலைமைக்குத் தங்களது முழுமையான மற்றும் 100 சதவீத ஆதரவை வெளிப்படுத்தும் முக்கிய அரசியல் தீர்மானம் கொண்டு வரப்பட்டது. கழகத்தை இக்கட்டான காலகட்டங்களிலும் மிகத் துணிச்சலோடு வழிநடத்தி, தொண்டர்களின் அரணாக விளங்கும் எடப்பாடி கே.பழனிசாமியே கட்சியின் பொதுச்செயலாளராகத் தொடர்ந்து நீடித்து வழிநடத்த வேண்டும் என்று கூட்டத்தில் ஒருமனதாகத் தீர்மானிக்கப்பட்டது. 

மேலும், தேர்தல் முடிவுகளைக் கடந்து, களத்தில் தொண்டர்களை ஒருங்கிணைத்து மக்கள் பணிகளைத் தொய்வின்றித் தொடரவும், கழகத்தை அடுத்தகட்ட எழுச்சிக்குக் கொண்டு செல்லவும் நிர்வாகிகள் அனைவரும் ஒன்றிணைந்து பாடுபட வேண்டும் என எஸ்.பி. சண்முகநாதன்  கேட்டுக்கொண்டார். இக்கூட்டத்தில் மாவட்ட, ஒன்றிய, நகர மற்றும் பேரூர் கழக முக்கிய நிர்வாகிகள், சார்பு அணி நிர்வாகிகள் எனப் பலர் கலந்து கொண்டு தங்களது ஆதரவை முழங்கினர்.