அமெரிக்காவில் காகித ஆலையில் நச்சு ரசாயன தொட்டி வெடித்து விபத்து - 11 பேர் பலி? மீட்பு பணிகள் தீவிரம்!

அமெரிக்காவில் உள்ள பிரபல காகித உற்பத்தி ஆலையில் ஏற்பட்ட பயங்கர ரசாயன தொட்டி வெடிப்பு விபத்தில், உயிரிழந்தவர்களின் எண்ணிக்கை 9 ஆக உயர்ந்துள்ளது உறுதி செய்யப்பட்டுள்ளது. மேலும் மாயமான இருவரைத் தேடும் பணி தீவிரமாக நடைபெற்று வரும் நிலையில், பலி எண்ணிக்கை 11 ஆக உயரக்கூடும் என அஞ்சப்படுகிறது.

அமெரிக்காவின் வாஷிங்டன் மாகாணம் லாங்வியூ பகுதியில் செயல்பட்டு வரும் இந்த ஆலையில், மரக்கூழ்களைப் பயன்படுத்தி காகிதம் தயாரிக்கும் பணிகள் வழக்கம் போல் நடைபெற்று வந்தன. இதற்காக, ஆலை வளாகத்தில் உள்ள பிரம்மாண்ட ரசாயன தொட்டி ஒன்றில் சுமார் 5 லட்சம் கேலனுக்கும் அதிகமான ரசாயனக் கலவை சேமித்து வைக்கப்பட்டிருந்தது.

இந்நிலையில், அந்த நச்சு ரசாயனத் தொட்டி எதிர்பாராத விதமாகத் திடீரென பயங்கர சத்தத்துடன் வெடித்துச் சிதறியது. தொட்டியிலிருந்து வெளியேறிய லட்சக்கணக்கான கேலன் ரசாயன திரவம், ஆலை வளாகத்திற்குள் வெள்ளம் போல் பெருக்கெடுத்து ஓடியது.

ரசாயன வெள்ளத்தின் வேகம் காரணமாக, ஆலை வளாகத்தில் காகிதங்களை ஏற்றிச் செல்வதற்காக நிறுத்தி வைக்கப்பட்டிருந்த பல சிறிய ரக லாரிகள் மற்றும் வாகனங்கள் தலைகீழாகக் கவிழ்ந்தன. மேலும், வெடிவிபத்தின் தாக்கத்தால் ஆலையின் முக்கியக் கட்டிட அமைப்புகளும் பலத்த சேதமடைந்தன. இந்த திடீர் விபத்தில், அங்கு நள்ளிரவுப் பணியில் ஈடுபட்டிருந்த தொழிலாளர்கள் பலர் நச்சுத் திரவத்திற்குள் சிக்கிக் கொண்டனர்.

விபத்து நடந்த தினத்திலிருந்து உள்ளூர் மீட்புக் குழுவினர் தொடர்ந்து உடல்களை மீட்கும் பணியில் ஈடுபட்டு வருகின்றனர். வியாழக்கிழமை வரை சம்பவ இடத்திலிருந்து 8 தொழிலாளர்களின் உடல்கள் மீட்கப்பட்டிருந்தன. நேற்று வரை மேலும் ஒரு தொழிலாளரின் உடல் கண்டெடுக்கப்பட்டதை அடுத்து, உயிரிழப்பு 9 ஆக அதிகாரப்பூர்வமாக உறுதி செய்யப்பட்டுள்ளது.

தற்போது மேலும் 2 தொழிலாளர்கள் மாயமாகியுள்ளதால், அவர்களைத் தேடும் பணி போர்க்கால அடிப்படையில் நடந்து வருகிறது. எனினும், அவர்கள் உயிர்பிழைத்திருக்க வாய்ப்பில்லை என்பதால் ஒட்டுமொத்த பலி எண்ணிக்கை 11 ஆக இருக்கும் என்று அஞ்சப்படுகிறது. 

தொட்டியிலிருந்து வெளியேறிய ரசாயனக் கலவை மிக அதிக நச்சுத்தன்மை வாய்ந்தது என்பதால், ஆலை முழுவதும் அடர்ந்த நச்சு வாயு பரவியுள்ளது. இந்த வாயுவை சுவாசிப்பது கடுமையான சுவாசப் பாதிப்புகளையும், உடலின் உள் உறுப்புகளில் கடுமையான காயங்களையும் ஏற்படுத்தும் என மருத்துவர்கள் எச்சரித்துள்ளனர்.

இதன் காரணமாக, நவீன பாதுகாப்பு உபகரணங்களுடன் சென்றாலும் மீட்புக் குழுவினரால் ஆலைக்குள் முழுமையாகச் செயல்பட முடியாத நிலை ஏற்பட்டுள்ளது. இந்த நச்சு வாயுவை சுவாசித்ததால் மீட்புப் பணியில் ஈடுபட்டிருந்த தீயணைப்பு வீரர் ஒருவர் உட்பட மொத்தம் 8 பேர் படுகாயமடைந்து மருத்துவமனையில் அனுமதிக்கப்பட்டுள்ளனர்.

இக்கோர விபத்தில் உயிரிழந்த தொழிலாளர்களின் குடும்பத்தினருக்கு, சம்பந்தப்பட்ட காகித உற்பத்தி நிறுவனம் தங்களது ஆழ்ந்த இரங்கலைத் தெரிவித்துக் கொண்டுள்ளது. மேலும், இந்த விபத்துக்கான சரியான காரணம் என்ன? பாதுகாப்பு வழிமுறைகள் முறையாகப் பின்பற்றப்பட்டதா? என்பது குறித்து அமெரிக்காவின் தொழில் பாதுகாப்பு மற்றும் சுகாதார நிர்வாகம் (OSHA) மற்றும் உள்ளூர் போலீஸார் இணைந்து தீவிர விசாரணையைத் தொடங்கியுள்ளனர்.