தனியார் பங்களிப்புடன் விண்வெளி ஆய்வு: சுற்றுப்பாதையில் நிலைநிறுத்திய விக்ரம்-1!

ஹைதராபாத்தைச் சேர்ந்த 'ஸ்கைரூட் ஏரோஸ்பேஸ்' நிறுவனம் வடிவமைத்துள்ள 'விக்ரம்-1' ராக்கெட், ஆந்திர மாநிலம் ஸ்ரீஹரிகோட்டாவிலுள்ள சதீஷ் தவான் விண்வெளி ஆய்வு மையத்தின் முதலாவது ஏவுதளத்திலிருந்து விண்ணில் செலுத்தப்பட்டது. 

இந்திய மண்ணிலிருந்து தனியார் நிறுவனம் ஒன்று விண்கலங்களைச் சுற்றுப்பாதையில் நிலைநிறுத்தும் முதல் ஏவுதல் திட்டம் இதுவாகும்.

முழுவதும் கார்பன் கலப்புக் கட்டமைப்பைக் கொண்டு 7 மாடிகள் கொண்ட பல நிலைகளாக இந்த ராக்கெட் உருவாக்கப்பட்டுள்ளது. 'ஆகமன்' எனப் பெயரிடப்பட்ட இத்திட்டத்தின் கீழ், சனிக்கிழமை நண்பகல் 11:30 மணிக்கு ராக்கெட் ஏவப்படத் திட்டமிடப்பட்டிருந்தது. எனினும், கவுன்டவுண் முடியும் தருவாயில் (4 நிமிடங்கள் 59 வினாடிகள் இருந்தபோது) ஏற்பட்ட தொழில்நுட்பக் கோளாறு காரணமாக ஏவுதல் தற்காலிகமாக நிறுத்தப்பட்டது. பின்னர் பொறியாளர்களால் கோளாறு சரிசெய்யப்பட்டு, நண்பகல் 12:06 மணிக்கு ராக்கெட் விண்ணில் செலுத்தப்பட்டது.

புவி ஈர்ப்பு விசையைக் கடந்து பயணித்த இந்த ராக்கெட், பூமிக்கு மேலே சுமார் 450 கி.மீ உயரமுள்ள சுற்றுப்பாதையில் ஆய்வு கருவிகளை (பேலோடுகளை) நிலைநிறுத்தியது. இந்த விக்ரம்-1 ராக்கெட், 350 கிலோ எடை வரையிலான செயற்கைக்கோள்களை விண்வெளிக்குச் சுமந்து செல்லும் திறன் கொண்டது என விண்வெளி ஆய்வு மையத் தரவுகள் தெரிவிக்கின்றன.