ஓமனில் எண்ணெய்க் கப்பலை தாக்கிய அமெரிக்கா: 3 மாலுமிகள் பலி - இந்தியா கண்டனம்!

ஓமன் கடற்பகுதியில் அமெரிக்கப் படைகள் நடத்திய அதிரடி ஏவுகணைத் தாக்குதலில், வணிகக் கப்பலில் பயணித்த மூன்று இந்திய மாலுமிகள் பரிதாபமாக உயிரிழந்துள்ளனர். 

காணாமல் போனதாகத் தேடப்பட்டு வந்த இவர்களின் உடல்கள் தற்பொழுது கண்டறியப்பட்டு அடையாளம் காணப்பட்டுள்ளதாக மத்திய கப்பல் போக்குவரத்துத் துறை அமைச்சர் சர்பானந்த சோனோவால் அதிகாரப்பூர்வமாக உறுதிப்படுத்தியுள்ளார். இச்சம்பவத்திற்கு இந்தியா தனது மிகக் கடுமையான கண்டனங்களைப் பதிவு செய்துள்ளதோடு, அமெரிக்கத் தூதரை நேரில் வரவழைத்துக் கண்டனக் கடிதத்தை வழங்கியுள்ளது.

மத்திய கிழக்கு பிராந்தியத்தில் நிலவி வரும் கடுமையான பதற்றத்திற்கு இடையே, பலாவு நாட்டுப் (Palau) கொடியுடன் 'எம்.டி. செட்டபெல்லோ' என்ற வணிக எண்ணெய் விநியோகக் கப்பல் ஓமன் கடற்பகுதி வழியாகச் சென்று கொண்டிருந்தது. இக்கப்பலில் மொத்தம் 24 இந்திய மாலுமிகள் பணியில் இருந்துள்ளனர். அப்போது, ஈரான் துறைமுகங்கள் மீது அமெரிக்கா விதித்துள்ள கடுமையான கடல்சார் முற்றுகையை மீறி, இக்கப்பல் ஈரானில் இருந்து கச்சா எண்ணெய்யைக் கடத்திச் செல்ல முயன்றதாகக் கூறி, அமெரிக்க மத்திய பாதுகாப்பு மையம்  இக்கப்பலைக் குறிவைத்துத் தனது வான்படை மூலம் துணிகரத் தாக்குதலை நடத்தியது.

அமெரிக்கப் படைகளின் எச்சரிக்கைகளைத் தொடர்ந்து இக்கப்பலின் மாலுமிகள் புறக்கணித்ததால், அமெரிக்கப் போர் விமானம் கப்பலின் எஞ்சின் அறையை (Engine Room) நோக்கிப் பாய்ந்து துல்லியமான ஏவுகணைத் தாக்குதலை நடத்தியதாக அமெரிக்கத் தரப்பில் தெரிவிக்கப்பட்டுள்ளது.

இந்தக் கொடூரத் தாக்குதலின் போது கப்பலில் பெரும் தீ விபத்து ஏற்பட்டதில், 21 இந்திய மாலுமிகள் பத்திரமாக மீட்கப்பட்ட நிலையில், 3 மாலுமிகள் கடலில் காணாமல் போனதாகத் தேடப்பட்டு வந்தனர். இந்நிலையில், இன்று வியாழக்கிழமை செய்தியாளர்களைச் சந்தித்த மத்திய அமைச்சர் சர்பானந்த சோனோவால், காணாமல் போன மூன்று மாலுமிகளின் உடல்களும் மீட்கப்பட்டு, அவர்கள் உயிரிழந்தது உறுதி செய்யப்பட்டுள்ளதாகத் தெரிவித்தார்.

இது குறித்து அவர் தனது சமூக வலைதளப் பதிவில், "எம்.டி. செட்டபெல்லோ வணிகக் கப்பலில் நிகழ்ந்த இந்தத் துயரச் சம்பவம் ஒட்டுமொத்த கடல்சார் குடும்பத்திற்கும் ஈடுசெய்ய முடியாத ஒரு பெரும் இழப்பாகும். இந்த இக்கட்டான சூழ்நிலையில் மாண்புமிகு பிரதமர் நரேந்திர மோடி தலைமையிலான மத்திய அரசு, உயிரிழந்த மாலுமிகளின் குடும்பத்தினருக்குப் பின்னால் உறுதியாகத் துணையாக நிற்கும். 

பாதிக்கப்பட்ட குடும்பங்களுக்குத் தேவையான அனைத்து அத்தியாவசிய உதவிகளையும் அரசு முழுமையாக வழங்கும்" என்று குறிப்பிட்டுள்ளார். மேலும், மீட்கப்பட்ட 21 மாலுமிகளை உடனடியாக தாயகம் அழைத்து வரவும், உயிரிழந்தவர்களின் உடல்களை அவர்களின் இறுதிச் சடங்கிற்காக விரைவாக இந்தியா கொண்டு வரவும் அதிகாரிகளுக்கு உத்தரவிட்டுள்ளதாக அமைச்சர் தெரிவித்தார்.

சர்வதேசக் கடல் எல்லைப் பகுதியில் இந்திய மாலுமிகளின் உயிருக்கு அச்சுறுத்தல் ஏற்படுத்தும் வகையில் அமெரிக்க ராணுவம் நடத்திய இந்தத் தாக்குதலுக்கு இந்திய வெளியுறவு அமைச்சகம் தனது கடுமையான கண்டனத்தை வெளியிட்டுள்ளது. 

புது தில்லியில் உள்ள அமெரிக்கத் தூதரகத்தின் பொறுப்பு அதிகாரியை வெளியுறவுத் துறை அதிகாரிகள் புதன்கிழமை நேரில் வரவழைத்து, இத்தாக்குதலுக்கு எதிராக இந்தியாவின் மிகக் கடுமையான தூதரக எதிர்ப்பைப் பதிவு செய்தனர். வணிகக் கப்பல்கள் மீதான இத்தகைய ராணுவத் தாக்குதல்கள் முற்றிலும் ஏற்றுக்கொள்ள முடியாதவை என்றும், இந்திய மாலுமிகளின் பாதுகாப்பைச் சர்வதேச நாடுகள் உறுதி செய்ய வேண்டும் என்றும் இந்தியா திட்டவட்டமாக வலியுறுத்தியுள்ளது.