தவெக எம்எல்ஏவிடம் பேரம் பேசிய வழக்கில் 3 பேர் அதிரடி கைது... பரபரப்புத் தகவல்கள்!

தமிழ்நாடு சட்டப்பேரவையில் சபாநாயகருக்கு எதிரான தீர்மான வாக்கெடுப்பில் தங்களுக்கு ஆதரவாகச் செயல்படத் தவெக சட்டமன்ற உறுப்பினரிடம் ரூ.35 கோடி லஞ்சம் தர முயன்று, கொலை மிரட்டல் விடுத்த வழக்கில் 3 பேரைச் சென்னைத் திருவல்லிக்கேணி காவல்துறையினர் கைது செய்துள்ளனர்.

கிருஷ்ணகிரி மாவட்டம் ஊத்தங்கரை தொகுதி தவெக சட்டமன்ற உறுப்பினரான என்.இளையராஜாவைச் சில தினங்களுக்கு முன்பு திருநாவுக்கரசு என்ற நபர் தொலைபேசியில் தொடர்பு கொண்டுள்ளார். தான் இந்திய அரசியல் ஜனநாயக உத்திகள் (IPDS) என்ற கருத்துக்கணிப்பு நிறுவனத்தை நடத்தி வருவதாகவும், ஒரு முக்கியக் கட்சியின் வேண்டுகோளின் பேரில் பேசுவதாகவும் கூறியுள்ளார்.

தொடர்ந்து பேசிய அவர், சட்டப்பேரவையில் சபாநாயகருக்கு எதிராகக் கொண்டு வரப்படவுள்ள தீர்மானத்தின் மீதான வாக்கெடுப்பில் தங்களுக்கு சாதகமாக நடந்துகொள்ள வேண்டும் என்றும், அதற்குச் சன்மானமாக ரூ.35 கோடி தருவதாகவும் ஆசைவார்த்தை காட்டியுள்ளார். இதற்கு எம்எல்ஏ இளையராஜா மறுப்புத் தெரிவிக்கவே, இத்தகவலை வெளியே கூறினால் அவருக்கும் அவரது குடும்பத்தினருக்கும் பின்விளைவுகள் ஏற்படும் எனத் திருநாவுக்கரசு மிரட்டல் விடுத்துள்ளார்.

இது குறித்து சட்டமன்ற உறுப்பினர் இளையராஜா கடந்த ஜூன் 29-ஆம் தேதியன்று சென்னை பெருநகர காவல் ஆணையரிடம் சட்டப்படி நடவடிக்கை கோரிப் புகார் அளித்தார். இப்புகாரின் பேரில் டி-1 (D1) திருவல்லிக்கேணி காவல் நிலையத்தில் வழக்குப்பதிவு செய்யப்பட்டுத் தீவிரப் புலன் விசாரணை மேற்கொள்ளப்பட்டது.

இதன் அடிப்படையில், இச்சம்பவத்தில் நேரடியாக ஈடுபட்ட சென்னை அரும்பாக்கத்தைச் சேர்ந்த திருநாவுக்கரசு, அவருக்குப் பின்னணியாகச் செயல்பட்ட திருச்சியைச் சேர்ந்த நரேஷ் மற்றும் சென்னை மேடவாக்கத்தைச் சேர்ந்த தியாகராஜன் ஆகிய 3 பேரைத் தனிப்படை காவல்துறையினர் கைது செய்தனர்.

காவல்துறையினரின் தொடர் விசாரணையில், திமுக முன்னாள் அமைச்சரும் தற்போதைய கோயம்புத்தூர் தெற்கு சட்டமன்ற உறுப்பினருமான வி.செந்தில்பாலாஜியின் சகோதரர் வி.அசோக்குமார், இந்த வழக்கில் கைதாகியுள்ள நரேஷைச் சென்னையில் சந்தித்துப் பேசியது தெரியவந்துள்ளது. 

வி.செந்தில்பாலாஜி மற்றும் வி.அசோக்குமார் ஆகியோரின் அறிவுறுத்தலின் பேரிலேயே, திருநாவுக்கரசு தவெக சட்டமன்ற உறுப்பினர் இளையராஜாவைத் தொடர்பு கொண்டு பேரம் பேசியது முதற்கட்ட விசாரணையில் அம்பலமாகியுள்ளது. இவ்வழக்கு குறித்துத் திருவல்லிக்கேணி காவல்துறையினர் தொடர்ந்து தீவிர விசாரணை நடத்தி வருகின்றனர்.