குழந்தையின் பிரேதப் பரிசோதனை இடத்தில் தவெக எம்எல்ஏ பேரம்? - கனிமொழி எம்பி குற்றச்சாட்டு!

தமிழகத்தில் சட்டம் ஒழுங்கு முற்றிலுமாகச் சீர்குலைந்து, பெண்களுக்கு எதிரான குற்றங்களை மூடி மறைக்கும் வழிகளைத்தான் ஆளும் தமிழக வெற்றிக் கழகத்தினர் தேடி வருகிறார்கள் எனத் திமுக துணைப் பொதுச்செயலாளரும் நாடாளுமன்ற திமுக குழுத் தலைவருமான கனிமொழி எம்பி மிகக் கடுமையான குற்றச்சாட்டுகளை முன்வைத்துள்ளார்.

சென்னை அண்ணா அறிவாலயத்தில் இன்று செய்தியாளர்களைச் சந்தித்த அவர், தற்போதைய தவெக அரசின் செயல்பாடுகள் குறித்து எழுப்பப்பட்ட பல்வேறு கேள்விகளுக்குக் காரசாரமாகப் பதிலளித்துப் பேசினார்.

அப்போது அவர் கூறுகையில், "பெண்களுக்கு எதிரான குற்றங்கள் நடைபெறுகிறது என்ற பொய்யான பிரச்சாரத்தை மட்டுமே முன்னிறுத்தி தவெகவினர் ஆட்சிக்கு வந்துள்ளார்கள். ஆனால், அவர்கள் ஆட்சிப் பொறுப்பை ஏற்ற பிறகு, மாநிலத்தில் ஒவ்வொரு நாளும் பெண்களுக்கு எதிரான குற்றங்களும், பிஞ்சுப் குழந்தைகளுக்கு எதிரான பாலியல் குற்றங்களும் தொடர்ந்து அதிகரித்துக் கொண்டே இருக்கின்றன. இதைப் பற்றி அரசுக்கு எவ்வித கவலையும் அக்கறையும் இல்லை.

அதைவிட மோசமாக, நடக்கும் குற்றங்களை எப்படி மூடி மறைப்பது என்பதற்கான வழிகளைத்தான் ஆளுங்கட்சியினர் தேடிக் கொண்டிருக்கிறார்கள். சமீபத்தில், பாதிக்கப்பட்ட ஒரு குழந்தையின் பிரேதப் பரிசோதனை (ஆட்டோப்சி) நடைபெறும் இடத்திற்கே ஆளுங்கட்சி எம்எல்ஏ ஒருவர் நேரடியாக உள்ளே சென்று, அந்த ஏழைக் குழந்தையின் பெற்றோருடன் பேரம் பேசும் அளவுக்கு மிக மோசமான நிலை ஏற்பட்டுள்ளது. எங்களுடைய மகளிரணியைச் சேர்ந்த சகோதரி ஒருவர் இந்த அவல நிகழ்வை நேரில் பார்த்திருக்கிறார். இப்படி ஒரு மிக மோசமான சூழலுக்குத்தான் தமிழ்நாட்டை அவர்கள் தள்ளியிருக்கிறார்கள்.

'சிங்கப்பெண்' படை என்று பெயர் மாற்றம் செய்து விளம்பரம் செய்வதைப் பற்றி நாங்கள் பெரிதாகப் பேச விரும்பவில்லை. ஆனால், அந்தப் படைக்கு என்ன அதிகாரம் வழங்கப்பட்டுள்ளது? அவர்களுக்குத் தனிப்பட்ட முறையில் ஒரு அவசரத் தொலைபேசி எண் கூடக் கிடையாது. ஏதேனும் ஒரு குற்றச் சம்பவமோ அல்லது பிரச்சினையோ ஏற்பட்டால், பாதிக்கப்பட்ட பெண்கள் தங்களைக் காப்பாற்றிக் கொள்ள மகளிர் ரோந்து வாகனத்தைத் தொடர்புகொள்வதற்கான வழிவகை கூட இங்கு இல்லை.

குழந்தைகளுக்கு எதிரான குற்றங்கள் நாளுக்கு நாள் அதிகரித்துக் கொண்டிருக்கும் சூழலில், முதலமைச்சர் விஜய் இதுவரை வாய் திறந்து ஒரு வார்த்தை கூட இதைப் பற்றிப் பேசுவதற்குத் தயாராக இல்லை. இதன் மூலம் மக்கள் மீதும், பெண்கள் மற்றும் குழந்தைகள் மீதும் இந்த அரசுக்கு எந்த அக்கறையும் இல்லை என்பது தெளிவாகிறது. மேலும், தன் நேரடிக் கட்டுப்பாட்டின் கீழ் செயல்படும் காவல்துறையைக் கூட முதல்வர் முறையாகக் கவனிப்பதாகத் தெரியவில்லை.

பல பாலியல் குற்றச் சம்பவங்களில் ஆளுங்கட்சியினரே நேரடியாகத் தொடர்புடையவர்களாக இருப்பது தெளிவாகத் தெரிகிறது. தனிமனித ஒழுக்கம் மற்றும் போதைப்பொருள் ஒழிப்பு குறித்து வெளியில் மேடைகளில் தொடர்ந்து பேசும் ஆட்சியாளர்கள், தங்களின் அடிப்படைக் கடமைகளிலிருந்தே முற்றிலுமாகத் தவறி வருகிறார்கள்.

முக்கியமாக, பெண்களின் உடையால்தான் அவர்களுக்கு எதிரான குற்றங்கள் நடைபெறுகின்றன என்ற பிற்போக்கான கருத்துகளைத் தனது திரைப்படங்களில் பேசியவர்தான் இன்று மாநிலத்தின் ஆட்சிப் பொறுப்பில் இருக்கிறார். எனவே, தற்போதைய குற்றங்களுக்கும் பெண்கள் மீதுதான் அவர்கள் பழியைத் திருப்புகிறார்களா என்று தெரியவில்லை," என்று கனிமொழி எம்பி தனது பேட்டியில் மிகக் கடுமையான விமர்சனங்களை முன்வைத்துள்ளார்.