பிளஸ்-2 மதிப்பெண் அடிப்படையில் மருத்துவச் சேர்க்கை : பிரதமர் மோடிக்கு மு.க. ஸ்டாலின் கடிதம்!

» செய்திகள் - விளையாட்டு » தமிழகம்

பிளஸ்-2 மதிப்பெண் அடிப்படையில் மருத்துவச் சேர்க்கை : பிரதமர் மோடிக்கு மு.க. ஸ்டாலின் கடிதம்!

வெள்ளி 15, மே 2026 10:31:44 AM (IST)

நீட் தேர்வில் தொடர்ந்து முறைகேடுகள் நடைபெற்று வருவதால், பிளஸ்-2 மதிப்பெண் அடிப்படையில் மருத்துவச் சேர்க்கை நடத்த அனுமதிக்க வேண்டும் என்று முன்னாள் முதலமைச்சர் மு.க. ஸ்டாலின் பிரதமருக்குக் கடிதம் எழுதியுள்ளார்.

நீட் தேர்வில் தொடர்ந்து நடைபெறும் முறைகேடுகளைச் சுட்டிக்காட்டி, இந்த ஆண்டு மறுதேர்வு நடத்தும் முடிவைக் கைவிட்டு, பிளஸ்-2 மதிப்பெண் அடிப்படையில் மருத்துவச் சேர்க்கை நடத்த அனுமதிக்க வேண்டும் என்று முன்னாள் முதலமைச்சர் மு.க. ஸ்டாலின் பிரதமருக்குக் கடிதம் எழுதியுள்ளார்.

கடிதத்தின் முக்கிய அம்சங்கள்: 2026-ஆம் ஆண்டு நீட் தேர்வில் வினாத்தாள் கசிவு மற்றும் 45-க்கும் மேற்பட்டோர் கைது செய்யப்பட்டுள்ளதைச் சுட்டிக்காட்டியுள்ள அவர், "22.8 லட்சம் மாணவர்கள் தங்களின் எதிர்காலம் குறித்துத் தவிப்பில் உள்ளனர். 2015-ல் AIPMT தொடங்கி, 2024-ல் தன்னிச்சையான கருணை மதிப்பெண்கள் வழங்கியது வரை நீட் தேர்வு முறைகேடுகளின் கூடாரமாகவே உள்ளது" என்று சாடியுள்ளார்.

நீட் தேர்வு என்பது தகுதிக்கானது அல்ல, அது பணம் கொழிக்கும் வணிகமாக மாறிவிட்டதாக அவர் குறிப்பிட்டுள்ளார். "நீட் பயிற்சி மையங்களில் சுமார் 70 ஆயிரம் கோடி ரூபாய் வரை வருமானம் புரள்கிறது. பல லட்சம் செலவழித்துச் சிறப்புப் பயிற்சி பெற முடியாத ஏழை, எளிய மற்றும் கிராமப்புற மாணவர்களுக்கு நீட் ஒரு பெரும் தடைக்கல்லாக உள்ளது" என அவர் கவலை தெரிவித்துள்ளார்.

தமிழ்நாடு அரசு ஏற்கனவே 2021 மற்றும் 2022-ஆம் ஆண்டுகளில் நீட் விலக்கு கோரி ஒருமனதாகச் சட்டம் இயற்றியதை நினைவுகூர்ந்த அவர், குடியரசுத் தலைவரின் ஒப்புதல் நிறுத்தி வைக்கப்பட்டது தமிழக மக்களிடையே பெரும் ஏமாற்றத்தை அளித்துள்ளதாகக் கூறியுள்ளார்.

தற்போது நிலவும் அசாதாரணச் சூழலைக் கருத்தில் கொண்டு, மு.க. ஸ்டாலின் பிரதமரிடம் முன்வைத்துள்ள கோரிக்கைகள்:

மறுதேர்வு வேண்டாம்: ஏற்கனவே மன உளைச்சலில் உள்ள மாணவர்களுக்கு மறுதேர்வு என்பது கூடுதல் சுமையாக அமையும்.

அவசரச் சட்டம்: தேசிய மருத்துவ ஆணையச் சட்டம் 2019-இல் திருத்தம் மேற்கொண்டு, 2026-27 கல்வியாண்டுக்கான மருத்துவச் சேர்க்கையை மாநில அரசுகளே அந்தந்த மாநில பள்ளிப் பொதுத்தேர்வு மதிப்பெண் அடிப்படையில் நடத்த அவசரச் சட்டம் இயற்ற வேண்டும்.

லட்சக்கணக்கான ஏழை மற்றும் பிற்படுத்தப்பட்ட மாணவர்களின் எதிர்காலத்தைக் கருத்தில் கொண்டு பிரதமர் இதில் உடனடியாகத் தலையிட வேண்டும் என்று அவர் தனது கடிதத்தில் வலியுறுத்தியுள்ளார்.

மக்கள் கருத்து

மக்கள் பதிவு செய்யும் கருத்துகள் தணிக்கையின்றி பிரசுரமாகும் வகையில் மென்பொருள் வடிவமைக்கப்பட்டுள்ளது. தொழில்நுட்ப குறைபாடுகள் காரணமாக கருத்துக்கள் பதிவாவதில் சிறிது காலதாமதம் ஏற்பட வாய்ப்புள்ளது. வாசகர்களின் கருத்துக்களுக்கு நிர்வாகம் பொறுப்பாக மாட்டார்கள். நாகரீகமற்ற மற்றும் பிறர் மனதை புண்படுத்தகூடிய கருத்துகளை / வார்த்தைகளைப் பயன்படுத்துவதை தவிர்க்கும்படி கேட்டுக்கொள்கிறோம்.

ஆங்கிலத்தில் தட்டச்சு செய்ய Ctrl+G -ஐ அழுத்தவும்.

பெயர்: கருத்து:

பிளஸ்-2 மதிப்பெண் அடிப்படையில் மருத்துவச் சேர்க்கை : பிரதமர் மோடிக்கு மு.க. ஸ்டாலின் கடிதம்!

» செய்திகள் - விளையாட்டு » தமிழகம்