தமிழர்கள் தலைநிமிர்ந்து வாழ மத்தியில் ஆட்சி மாற்றம் வேண்டும் : கனிமொழி பிரசாரம்!

தமிழர்கள் தலைநிமிர்ந்து வாழ வேண்டுமென்றால் மத்தியில் ஆட்சி மாற்றம் வேண்டும் என்று தி.மு.க. வேட்பாளர் கனிமொழி எம்.பி. திருச்செந்தூரில் பிரசாரம் செய்தார்.

நாடாளுமன்ற தேர்தலில் தூத்துக்குடி தொகுதியில் இந்தியா கூட்டணி சார்பில் போட்டியிடும் தி.மு.க. வேட்பாளர் கனிமொழி திருச்செந்தூர் தேரடி திடலில் நேற்று மாலையில் வாக்கு கேட்டு பிரசாரம் செய்தார். அப்போது அவர் பேசியதாவது: நடைபெற உள்ள நாடாளுமன்ற தேர்தல் வெறும் அரசியல் வெற்றிக்காக அல்ல. இந்த நாட்டை காப்பாற்ற வேண்டிய தேர்தல். முதல்-அமைச்சர் மு.க.ஸ்டாலின் சொன்னதை போல் 2-வது சுதந்திரப் போராட்டம் என்பதை நாம் உணர்ந்து கொள்ள வேண்டும். 

நமது அடையாளங்களை, மொழியை, தமிழ்நாட்டை காப்பாற்ற வேண்டிய கடமை நம் அனைவருக்கும் உள்ளது. மத்தியில் ஆட்சியில் இருக்கும் பா.ஜ.னதா நாட்டில் இருக்கும் மாநிலங்களின் உரிமைகளை பறிக்கிறது. இந்து மதத்தை இவர்கள் தான் காப்பாற்றுவது போல பேசுகிறார்கள். இவர்களிடமிருந்து இந்து மக்களை காப்பாற்ற வேண்டியது நமது கடமை. விவசாயிகள், தொழிலாளர்கள், வியாபாரிகளுக்கு எதிரான சட்டங்களை கொண்டு வந்துள்ளனர்.

முதல்-அமைச்சர் ஸ்டாலின் எத்தனையோ புதிய திட்டங்களை தமிழ்நாட்டுக்காக கொண்டு வந்துள்ளார். இளைஞர்களுக்கு வேலைவாய்ப்பு உருவாக்கி தரப்படுகிறது. பெண்களுக்கு பஸ்சில் கட்டணமில்லா பயண வசதி, கல்லூரியில் படிக்கும் மாணவியருக்கு மாதந்்தோறும் ஆயிரம் ரூபாய் வழங்கப்படுகிறது.

தமிழர்கள் தலைநிமிர்ந்து வாழ, இந்த நாடு தலைநிமிர எல்லா மக்களும் ஒன்றுபட்டு, ஒற்றுமையாக வாழ வேண்டுமென்றால் மத்தியில் ஆட்சி மாற்றம் வேண்டும். இந்தியா கூட்டணி வெற்றி பெற வேண்டும். நாடும் நமதாக வேண்டும், நாற்பதும் நமதாக வேண்டும் என்பதை நாம் புரிந்து கொள்ள வேண்டும்.மறவாதீர்கள் உங்களின் சின்னம் உதயசூரியன். உங்கள் பொன்னான வாக்குகளை உதயசூரியன் சின்னத்தில் அளித்து மீண்டும் உங்களுடன் பணியாற்ற எனக்கு வாய்ப்பு தாருங்கள். இவ்வாறு அவர் பேசினார்.

இதில், தமிழக மீன்வளம், மீனவர் நலன் மற்றும் கால்நடை பராமரிப்புத்துறை அமைச்சர் அனிதா ராதாகிருஷ்ணன், ஊர்வசி அமிர்தராஜ் எம்.எல்.ஏ., திருச்செந்தூர் சட்டமன்ற தொகுதி தி.மு.க. பொறுப்பாளர் அனிதா ஆனந்தமகேஷ்வரன், மாவட்ட பஞ்சாயத்து தலைவர் பிரம்மசக்தி, வர்த்தக அணி மாநில இணை செயலாளர் உமரிசங்கர், மாவட்ட இளைஞரணி அமைப்பாளர் ராமஜெயம், நகராட்சி தலைவர் சிவஆனந்தி, சமத்துவ மக்கள் கழக தலைவர் எர்ணாவூர் நாராயணன் உள்ளிட்ட இந்தியா கூட்டணி நிர்வாகிகள் பலர் கலந்து கொண்டனர்.