திருநெல்வேலி - சென்னை வந்தே பாரத் ரயிலை நாகர்கோவிலில் இருந்து இயக்கக் கோரிக்கை!

தினசரி இரவு 23:00 மணிக்கு திருநெல்வேலி வரும் இந்த ரயில், பயணிகள் இறங்கிய பின் காலிப் பெட்டிகளாக நாகர்கோவில் கொண்டு வரப்பட்டு, இங்குள்ள பிட்லைனில் (Pitline) இரவு முழுவதும் பராமரிக்கப்படுகிறது. பின்னர், அதிகாலை 04:00 மணியளவில் மீண்டும் காலிப் பெட்டிகளாக திருநெல்வேலிக்கு அனுப்பப்பட்டு, அங்கிருந்து காலை 06:00 மணிக்கு சென்னைக்குப் புறப்பட்டுச் செல்கிறது. சுமார் ஒரு வார காலத்திற்கு இந்த தற்காலிக ஏற்பாடு நடைமுறையில் இருக்கும் என அறிவிக்கப்பட்டுள்ளது.

இவ்வாறு கிலோமீட்டர் கணக்கில் காலிப் பெட்டிகளாக திருநெல்வேலிக்கு இயக்குவதற்குப் பதிலாக, இந்த ரயிலை நாகர்கோவிலில் இருந்தே சென்னைக்கு 'நாகர்கோவில் - சென்னை வந்தே பாரத்' ரயிலாக இயக்க வேண்டும் என்று கன்னியாகுமரி மாவட்ட ரயில் பயணிகள் சங்கம் கோரிக்கை விடுத்துள்ளது.  இதன் மூலம் நாகர்கோவில் ரயில் நிலையத்தில் வந்தே பாரத் ரயிலைப் பராமரிப்பதற்கான கட்டமைப்பு வசதிகளோ, இடநெருக்கடியோ இல்லை என்பது தெளிவாகியுள்ளது எனப் பயணிகள் சுட்டிக்காட்டுகின்றனர்.   இவ்வாறு காலி பெட்டிகளாக இயக்குவதை காட்டிலும் நேரடி ரயிலாக இயக்கும் போது ரயில்வே துறைக்கு வருவாய் கிடைக்கும். இதனால் கூடுதல் செலவுகள் ஒன்றும் ஏற்படுவது இல்லை.

இந்த வந்தே பாரத் ரயில் நாகர்கோவிலில் இருந்து இயக்கப்பட்டால், அதிகாலை 05:00 மணிக்கு புறப்படும் வகையில் கால அட்டவணை அமையக்கூடும். அதற்கு, அதிகாலை 04:30 மணிக்கு ரயிலின் காலி பெட்டிகளை நடைமேடையில் நிறுத்த வேண்டும். தற்போதைய சூழலில் அதிகாலையில் நடைமேடை பற்றாக்குறை இருப்பதாகக் கூறப்பட்டாலும், அதற்கு ஒரு எளிய தீர்வை பயணிகள் சங்கம் முன்வைக்கிறது.

தற்போது அதிகாலை 04:30 மணிக்குள் கோவை - நாகர்கோவில் ரயில் வந்து சேருகிறது. இந்த ரயிலின் காலிப் பெட்டிகள் காலை 06:25 மணி வரை நாகர்கோவில் நடைமேடையிலேயே நிறுத்தி வைக்கப்பட்டு, பின்னர் நாகர்கோவில் - கொல்லம் பயணிகள் ரயிலாக இயக்கப்படுகிறது. புதிய நடைமேடைகள் பயன்பாட்டுக்கு வரும் வரை, இந்த கோவை ரயிலை தற்காலிகமாக கன்னியாகுமரி வரை நீட்டித்து இயக்கினால், அதிகாலை 04:30 மணி முதல் 06:25 மணி வரை நிலவும் நடைமேடை நெருக்கடிப் பிரச்சனை முற்றிலும் சரியாகும். அதன் மூலம் காலை 05:00 மணிக்கு புறப்படும் வந்தே பாரத் ரயிலை எளிதாக இயக்க முடியும்.

மக்கள் பிரதிநிதிகளின் மெத்தனம் குறித்து அதிருப்தி: குமரி மாவட்டத்தின் இந்த நியாயமான கோரிக்கையை, உள்ளூர் நாடாளுமன்ற உறுப்பினர் மற்றும் மக்கள் பிரதிநிதிகள் தெற்கு ரயில்வே பொது மேலாளர் மற்றும் திருவனந்தபுரம் கோட்ட மேலாளர் ஆகியோரிடம் உடனடியாக   வலுவாக எடுத்துரைத்து, இந்த மாற்றுத் திட்டத்தை முன்வைக்க வேண்டும்.  ஆனால், துரதிர்ஷ்டவசமாக குமரி மாவட்ட மக்கள் பிரதிநிதிகள்  ரயில்வே அதிகாரிகளிடம் மனு அளிப்பதோடு தங்கள் கடமையை முடித்துக் கொள்கிறார்களே  தவிர, ரயில்வே அதிகாரிகள் கூறும் சாக்குப்போக்குகளைக் கேட்டுவிட்டு மெத்தனமாக இருக்கிறார்களே தவிர, திட்டங்களைச் செயல்படுத்த வலுவான அழுத்தம் தருவதில்லை எனப் பொதுமக்கள் மற்றும் சமூக ஆர்வலர்கள் கடும் அதிருப்தி தெரிவித்துள்ளனர்.