பாட்டியை கொன்று வாலிபர் தூக்குப்போட்டு தற்கொலை : குமரி அருகே சோகம்

திருவட்டார் அருகே பாட்டியை கொன்று வாலிபர் தூக்குப்போட்டு தற்கொலை செய்த சம்பவம் அந்த பகுதியில் சோகத்தை ஏற்படுத்தியது.

குமரி மாவட்டம், திருவட்டாறு அருகே சாரூா் மேலக்காட்டுவிளையைச் சோ்ந்தவா் புஷ்பராஜ். இவரது மனைவி பிளாரன்ஸ் (53). இவா்களுக்கு மகள் பிரியங்கா (24), மகன் அஜித் ஜின் (20) உள்ளனா். தனியாா் கல்வி நிறுவன வேனில் ஓட்டுநராக வேலைபாா்த்து வந்த புஷ்பராஜுக்கு மதுப்பழக்கம் இருந்துவந்த நிலையில், அவருடன் ஏற்பட்ட கருத்து வேறுபாட்டால் மனைவி பிளாரன்ஸ் அவரை விட்டு பிரிந்து மகள் பிரியங்காவுடன், சிதறாலில் உள்ள தனது தாயின் வீட்டருகே வாடகை வீட்டில் வசித்து வந்தாா். 

இந்நிலையில் மகன் அஜித் ஜின்னுடன் புஷ்பராஜ், தனது தாய் தாசம்மாளுடன் சாரூா் வீட்டில் வசித்து வந்தாா். கடந்த 2 ஆண்டுகளுக்கு முன்பு புஷ்பராஜ் இறந்துவிட்டாா். இந்நிலையில் பாட்டி தாசம்மாளின் பராமரிப்பில் இருந்த அஜித் ஜின் பெயிண்ட் கடை ஒன்றில் வேலைக்குச் சென்று வந்தாா். அஜித் ஜின்னுக்கு மதுப்பழக்கம் இருந்துள்ளது. இதை பாட்டி தாசம்மாள் கண்டித்துள்ளாா். 

இந்நிலையில் கடந்த வெள்ளிக்கிழமை இரவு மது போதையில் அஜித் ஜின் பாட்டி தாசம்மாளிடம் தகராறு செய்துள்ளாா். பின்னா் அவரைத் தாக்கியுள்ளாா். இதில் கட்டிலில் தலை மோதி தாசம்மாள் அங்கேயே உயிரிந்துள்ளாா். அச்சத்தின் காரணமாக அஜித் ஜின் வீட்டில் தூக்கிட்டு தற்கொலை செய்துகொண்டாா். 

இதையடுத்து நேற்று காலையில் தாசம்மாளின் வீட்டுப் பக்கமாகச் சென்றவா்கள் அஜித் ஜின் தூக்கில் தொங்கி நிற்பதையும், அறையில் தாசம்மாள் இறந்து கிடப்பதையும் பாா்த்து பிளாரன்ஸுக்கு தகவல் கொடுத்தனா். பின்னா் தகவலறிந்து சம்பவ இடத்துக்கு வந்த திருவட்டாறு போலீசார் இருவரது சடலத்தையும் கைப்பற்றி வழக்குப்பதிந்து ஆசாரிப்பள்ளம் மருத்துவக் கல்லூரி மருத்துவமனைக்கு அனுப்பி வைத்தனர். பாட்டியை கொன்று பேரன் தூக்கில் தொங்கி உயிரை மாய்த்துக் கொண்ட சம்பவம் அந்த பகுதியில் சோகத்தை ஏற்படுத்தியது.