டெல்லியைத் தாக்கிய கடுமையான புழுதிப் புயல் : 92 கி.மீ வேகத்தில் வீசிய சூறாவளிக் காற்று!

தலைநகர் டெல்லியின் அனைத்துப் பகுதிகளுக்கும் இந்திய வானிலை ஆய்வு மையம் 'ரெட் அலர்ட்' எச்சரிக்கை விடுத்திருந்த நிலையில், அங்கு நேற்று கடுமையான புழுதிப் புயல் வீசியதுடன் பரவலாக இடி, மின்னலுடன் கூடிய மழையும் பெய்துள்ளது.

டெல்லியின் பல இடங்களில் இடி, மின்னலுடன் லேசான மழை பெய்யக்கூடும் என முன்னதாக 'ஆரஞ்சு அலர்ட்' விடுக்கப்பட்டிருந்தது. ஆனால், வானிலையில் ஏற்பட்ட திடீர் மாற்றம் காரணமாக இது 'ரெட் அலர்ட்' ஆக உயர்த்தப்பட்டது. அதன்படி, தலைநகரின் சில பகுதிகளில் இடி, மின்னலுடன் லேசானது முதல் மிதமான மழை பெய்ததுடன், மணிக்கு 60 முதல் 80 கி.மீ வேகத்தில் பலத்த காற்று வீசியது. குறிப்பாக, பாலம் மற்றும் துவாரகா ஆகிய பகுதிகளில் நேற்று பிற்பகல் 2:30 மணி நிலவரப்படி, அதிகபட்சமாக மணிக்கு 92 கி.மீ வேகம் வரை சூறாவளிக் காற்று வீசியது.

டெல்லியை ஒட்டியுள்ள அரியானா மாநிலத்தின் ஃபதேஹாபாத், ஜிந்த், சோனிபட், ரோஹ்தக் உள்ளிட்ட பகுதிகளிலும் இந்த புழுதிப் புயலைத் தொடர்ந்து லேசான மழை பெய்யும் என வானிலை ஆய்வு மையம் கணித்துள்ளது.

டெல்லியில் நேற்று காலையிலும் லேசான மழைப் பொழிவு பதிவானது. இமயமலைப் பகுதியில் ஏற்பட்டுள்ள திடீர் மேற்கத்திய இடையூறு (Western Disturbance) காரணமாகவே இந்த தற்காலிக மழைப் பொழிவு ஏற்பட்டுள்ளதாக வானிலை நிபுணர்கள் தெரிவித்துள்ளனர். தீவிர மேற்கத்திய இடையூறுகளின் விளைவாக, வடமேற்கு இந்தியா முழுவதும் வரும் ஜூன் 19-ஆம் தேதி வரை மழை நீடிக்க வாய்ப்புள்ளது என ஐஎம்டி தெரிவித்துள்ளது.

வடமேற்கு இந்தியாவில் ஜூன் 19 வரை மழை தொடரும் என்று கணிக்கப்பட்டிருந்தாலும், டெல்லி தலைநகரப் பகுதியில் இந்த வானிலை அமைப்பின் தாக்கம் குறையத் தொடங்குவதால், இன்று (செவ்வாய்க்கிழமை) முதல் அங்கு படிப்படியாக வெப்பநிலை மீண்டும் உயரும் என்று நிபுணர்கள் எச்சரித்துள்ளனர். எனினும், நேற்று வீசிய புழுதிப் புயலும் மழையும் கடந்த சில நாட்களாக டெல்லி மக்களை வாட்டி வதைத்து வந்த கடுமையான வெப்ப அலையிலிருந்து (Heat Wave) தற்காலிக நிம்மதியை அளித்துள்ளது.