பாமக உட்கட்சிப் பூசலுக்கு முற்றுப்புள்ளி? தைலாபுரம் இல்லத்தில் ராமதாஸை சந்தித்த அன்புமணி!

பாமக நிறுவனர் ராமதாஸுக்கும், அவரது மகனும் பாமக தலைவருமான அன்புமணி ராமதாஸுக்கும் இடையே ஓராண்டுக்கும் மேலாக நிலவி வந்த தீவிர உட்கட்சி மற்றும் குடும்ப மோதல் போக்கு, இன்றைய நேரிடைச் சந்திப்பின் மூலம் சுமுக முடிவுக்கு வரும் என எதிர்பார்க்கப்படுகிறது.

பாமக கட்சி யாருக்குச் சொந்தம், கட்சியில் இறுதி முடிவெடுக்கும் அதிகாரம் யாருக்கு உள்ளது என்பது குறித்து நிறுவனர் ராமதாஸ் மற்றும் தலைவர் அன்புமணி ராமதாஸ் ஆகிய இரு தரப்பிற்கும் இடையே கடந்த ஓராண்டிற்கும் மேலாகப் பெரும் மோதல் போக்கு நீடித்து வந்தது. இது தொடர்பாக இரு தரப்பும் நீதிமன்றத்தில் வழக்குகளைத் தொடர்ந்ததுடன், கடந்த சட்டமன்றத் தேர்தலிலும் தனித்தனியே தங்களது தரப்பு வேட்பாளர்களை நிறுத்திப் போட்டியிட்டனர்.

இந்நிலையில், திண்டிவனம் அருகே உள்ள தைலாபுரம் தோட்ட இல்லத்திற்குப் பாமக தலைவர் அன்புமணி ராமதாஸ் இன்று நேரில் சென்று தனது தந்தை ராமதாஸைச் சந்தித்துப் பேசினார். ராமதாஸின் 61-ஆவது ஆண்டு திருமணநாளையொட்டி, அன்புமணி ராமதாஸ் தனது குடும்பத்தினருடன் சென்று இந்தச் சந்திப்பை மேற்கொண்டுள்ளார்.

தைலாபுரம் இல்லத்திற்கு வந்த தனது மகன் அன்புமணி ராமதாஸைப் பாமக நிறுவனர் ராமதாஸ் நெகிழ்ச்சியுடன் ஆரத்தழுவி வரவேற்றார். தொடர்ந்து, தனது தாய் மற்றும் தந்தையிடம் அன்புமணி ராமதாஸ் காலில் விழுந்து ஆசி பெற்றார்.

இச்சந்திப்பைத் தொடர்ந்து செய்தியாளர்களைச் சந்தித்த அன்புமணி ராமதாஸ், "இனி நல்லது நடக்கும்" என்று சுருக்கமாகப் பதிலளித்தார். தந்தை மற்றும் மகன் இடையே நீண்ட நாட்களாக நிலவி வந்த அரசியல் மற்றும் குடும்ப ரீதியிலான மோதல் போக்கு இச்சந்திப்பின் மூலம் முடிவுக்கு வந்துள்ளதால், பாமக தொண்டர்கள் மத்தியில் நெகிழ்ச்சியை ஏற்படுத்தியுள்ளது.