புகையிலைக்கு நாடு முழுவதும் முழுமையான தடை : மத்திய அரசு பதிலளிக்க உயர் நீதிமன்றம் உத்தரவு!

பெரும்பாலான மாநிலங்களில் புகையிலைப் பொருட்களுக்குத் தடை விதிக்கப்பட்டுள்ள நிலையில், நாடு முழுவதும் புகையிலைப் பயன்பாட்டுக்கு ஏன் முழுமையான தடை விதிக்கக் கூடாது என்பது குறித்து மத்திய அரசு பதிலளிக்க உயர் நீதிமன்ற மதுரை அமர்வு உத்தரவிட்டுள்ளது.

மதுரையைச் சேர்ந்த ஆர். மணிபாரதி, உயர் நீதிமன்ற மதுரை அமர்வில் தாக்கல் செய்த பொதுநல மனுவில் குறிப்பிட்டிருந்ததாவது: நாட்டின் தற்போதைய சூழலில் 13 முதல் 15 வயதுடைய பள்ளி மாணவர்களில் 8.5 சதவீதம் பேர் பல்வேறு வடிவங்களில் புகையிலையைப் பயன்படுத்துவது ஆய்வில் தெரியவந்துள்ளது. குறிப்பாக, கல்வி நிறுவனங்களைச் சுற்றியுள்ள கடைகளில் புகையிலை வகைகள் பெருமளவில் விற்பனை செய்யப்படுவதும் கண்டறியப்பட்டுள்ளது.

குட்கா, பான் பராக், பான் மசாலா போன்ற மெல்லும் புகையிலை வகைகளில் 4,000-க்கும் மேற்பட்ட வேதிப்பொருட்கள் உள்ளன. இவற்றில் குறைந்தபட்சம் 40 வேதிப்பொருட்கள் புற்றுநோயை நேரடியாக உண்டாக்கக்கூடியவை. மெல்லும் புகையிலைப் பயன்பாடானது, வாய் புற்றுநோய் மற்றும் இதய நோய்கள் உள்ளிட்ட பல நாள்பட்ட நோய்களுக்கான முக்கிய காரணியாக உள்ளது.

மெல்லும் மற்றும் நுகரப்படும் புகையிலையில் உள்ள 'நிகோடின்' (Nicotine) என்ற வேதிப்பொருள் வாய் அல்லது மூக்கின் திசுக்கள் வழியாக உடலுக்குள் உறிஞ்சப்படுகிறது. இது பக்கவாதம், வாய் புற்றுநோய் மற்றும் நுரையீரல் புற்றுநோய் ஏற்படும் அபாயத்தை மிகத் தீவிரமாக அதிகரிக்கிறது.

தமிழகத்தில் கடந்த 2023 நவம்பர் முதல் 2024 செப்டம்பர் வரையிலான காலகட்டத்தில் காவல் துறையினர் நடத்திய சோதனையில், 12,336 கிலோ 'கூல்-லிப்' (Cool-lip) உட்பட 1 லட்சத்து 27,561 கிலோ தடை செய்யப்பட்ட புகையிலைப் பொருட்கள் பறிமுதல் செய்யப்பட்டுள்ளன. தமிழகத்தில் தடை செய்யப்பட்ட புகையிலைப் பொருட்களின் விற்பனையைத் தடுக்க உயர் நீதிமன்றம் ஏற்கனவே பிறப்பித்த உத்தரவுகள் இன்னும் முழுமையாகச் செயல்படுத்தப்படவில்லை.

தமிழகப் பள்ளிகளில் புகையிலை இல்லாத கல்வி நிறுவன வழிகாட்டுதல்களை முறையாகச் செயல்படுத்த வேண்டும். குழந்தைகளுக்கான புகையிலை தடுப்பு மையங்களை அமைத்து, அங்கு மாணவர்களுக்கு ஆலோசனைகள் வழங்க உளவியலாளர்களை நியமிக்க வேண்டும்.பள்ளி மாணவர்களுக்கு ஒவ்வொரு கல்வி ஆண்டிலும் குறைந்தபட்சம் இரண்டு முறையாவது வாய்வழி மற்றும் பல் சுகாதாரப் பரிசோதனைகளை மேற்கொள்ள அரசுக்கு உத்தரவிட வேண்டும்.

இந்த மனு நீதிபதிகள் சதீஷ்குமார், ஜோதிராமன் ஆகியோர் அடங்கிய அமர்வில் விசாரணைக்கு வந்தது. வழக்கை விசாரித்த நீதிபதிகள்: தடை செய்யப்பட்ட புகையிலைப் பொருட்கள் விற்பனை தொடர்பாக உயர் நீதிமன்றம் ஏற்கனவே பிறப்பித்த உத்தரவை அமல்படுத்த எடுக்கப்பட்ட நடவடிக்கைகள் குறித்து தமிழக அரசு பதில் அளிக்க வேண்டும்.

பெரும்பாலான மாநிலங்களில் புகையிலைப் பொருட்களுக்குத் தடை இருக்கும்போது, நாடு முழுவதும் ஏன் முழுமையான தடை விதிக்கக் கூடாது என்பது தொடர்பாக மத்திய அரசு பதில் மனுத் தாக்கல் செய்ய வேண்டும் என உத்தரவிட்டு விசாரணையை ஒத்திவைத்தனர்.