ஆம்னி வேனில் கடத்திய 1,100 கிலோ ரேஷன் அரிசி பறிமுதல்! – ஓட்டுநர் கைது!

தூத்துக்குடியில் இருந்து திருநெல்வேலிக்கு ஆம்னி வேன் மூலமாக சட்டவிரோதமாகக் கடத்தப்பட்ட 1,100 கிலோ ரேஷன் அரிசியை தனிப்படை போலீசார் பறிமுதல் செய்து ஓட்டுநரைக் கைது செய்துள்ளனர்.

தூத்துக்குடி மாவட்டப் பகுதிகளில் ஏழை எளிய மக்களுக்கான பொது விநியோகத் திட்ட ரேஷன் அரிசி கடத்தப்படுவதைத் தடுக்கும் பொருட்டு, மாவட்டக் காவல் கண்காணிப்பாளர் உத்தரவின் பேரில் போலீசார் தீவிர உள்கட்டமைப்பு கண்காணிப்பில் ஈடுபட்டு வருகின்றனர்.

அதன்படி, இன்று காலை தூத்துக்குடி ரூரல் தனிப்படை சப்-இன்ஸ்பெக்டர்கள் சின்னத்துரை, அருணாச்சலம் மற்றும் தலைமைச் காவலர்கள் ஆனந்தகுமார், மாயாண்டி ஆகியோர் தூத்துக்குடி - திருநெல்வேலி தேசிய நெடுஞ்சாலையில் உள்ள வாகைகுளம் சோதனைச் சாவடியில் தீவிர வாகன சோதனையில் ஈடுபட்டுக் கொண்டிருந்தனர்.

அப்போது, தூத்துக்குடி திசையிலிருந்து திருநெல்வேலி நோக்கி அதிவேகமாக வந்த ஒரு மாருதி ஆம்னி வேனைத் தனிப்படை போலீசார் சந்தேகத்தின் பேரில் மடக்கி சோதனை செய்தனர். அவ்வாகனத்தை முழுமையாகச் சோதனை செய்தபோது, அதற்குள் மூடை மூடையாக ரேஷன் அரிசி மறைத்து வைக்கப்பட்டுச் சட்டவிரோதமாகக் கடத்திச் செல்லப்படுவது அம்பலமானது. 

வேனில் தலா 50 கிலோ எடைக் கொண்ட 22 மூடைகளில் மொத்தம் 1,100 கிலோ பொது விநியோகத் திட்ட ரேஷன் அரிசி இருப்பது உறுதி செய்யப்பட்டது. உடனடியாக 1,100 கிலோ ரேஷன் அரிசியையும், கடத்தலுக்குப் பயன்படுத்தப்பட்ட ஆம்னி வேனையும் தனிப்படையினர் உத்தியோகப்பூர்வமாகப் பறிமுதல் செய்தனர்.

மேலும், ரேஷன் அரிசியைக் கடத்தி வந்த வேன் ஓட்டுநரான தூத்துக்குடி மாவட்டம் வல்லநாடு, பெருமாள் கோவில் தெருவைச் சேர்ந்த குருநாதன் மகன் லட்சுமணன் (31) என்பவரை கைது செய்து புதுக்கோட்டை காவல் நிலையத்தில் ஒப்படைத்தனர். இச்சம்பவம் குறித்துப் புதுக்கோட்டை போலீசார் வழக்குப் பதிவு செய்து, ரேஷன் அரிசி யாரிடமிருந்து வாங்கப்பட்டது மற்றும் யாருக்குக் கடத்தப்பட இருந்தது என்பது குறித்த விசாரணை நடத்தி வருகின்றனர்.