மது பிரியர்களின் பார் ஆக மாறும் பூங்கா: மேயர் நடவடிக்கை எடுக்க கோரிக்கை!

தூத்துக்குடியில் பூங்காக்களை உரிய முறையில் பராமரிக்க வேண்டும் என சமத்துவ மக்கள் கழகம் கோரிக்கை விடுத்துள்ளது.

இது தொடர்பாக சமத்துவ மக்கள் கழகம் சார்பில் மாவட்ட செயலாளர் மாலைசூடி அற்புதராஜ் மேயருக்கு விடுத்துள்ள கோரிக்கை மனுவில், "தூத்துக்குடி மாநகராட்சிக்குட்பட்ட பூபால ராயபுரம் கருப்பட்டி சொசைட்டி ரவுண்டானா பகுதியில் அமைந்துள்ள 2 பூங்காக்களில் உள்ள சிறுவர் சிறுமியர்கள் பொழுது போக்குக்காக விளையாடக்கூடிய விளையாட்டு உபகரணங்கள் மிகவும் பழுதடைந்து பயன்படுத்த முடியாத நிலையில் இருக்கிறது அதன் சுற்றுச்சுவர்கள் மிகவும் ஆபத்தான நிலையில் உள்ளது.

மேலும் அதன் எதிர்புறம் அமைந்துள்ள டாஸ்மாக் மதுபான கடையில் மது பாட்டில்களை வாங்கிக் கொண்டு வரும் நபர்கள் பூங்கா உள்ளே அமர்ந்து பார்போல் மது அருந்துவதும், கெட்ட கெட்ட தகாத வார்த்தைகளை பேசிக்கொண்டும் அமர்ந்திருப்பதனால் பூங்காவிற்கு பொதுமக்களும், குழந்தைகளும் வருவதில் மிகவும் அச்சப்படுகின்றனர். ஆகவே தயவு கூர்ந்து மேற்படி பூங்காக்களை உரிய முறையில் பராமரித்து உரிய பாதுகாப்பு ஏற்பாடுகள் செய்து பொதுமக்களுக்கும் குழந்தைகளுக்கும் பயனுள்ளதாக உருவாக்கித் தரும்படி கோரிக்கை விடுத்துள்ளார்.