நாகர்கோவில் மாநகராட்சி பகுதிகளில் தூய்மை பணி: ஆட்சியர் ஸ்ரீதர் துவக்கி வைத்தார்!

கன்னியாகுமரி மாவட்டம், நாகர்கோவில் மாநகராட்சி சார்பில் நாகர்கோவில் பெண்கள் கிறிஸ்தவ கலை மற்றும் அறிவியல் கல்லூரி வளாகத்தில் மாநகராட்சி பகுதிகளை தூய்மைப்படுத்துவது குறித்த விழிப்புணர்வு பேரணி இன்று (20.09.2023) நடைபெற்றது. இந்நிகழ்ச்சியினை மாவட்ட ஆட்சியர் ஸ்ரீதர், நாகர்கோவில் மாநகராட்சி மேயர் ரெ.மகேஷ், நாகர்கோவில் மாநகராட்சி ஆணையர் ஆனந்த் மோகன், ஆகியோர் முன்னிலையில் துவக்கி வைத்து தெரிவிக்கையில் -

கன்னியாகுமரி மாவட்டத்தை குப்பையில்லா மாவட்டமாகவும், பசுமை மாவட்டமாகவும், முழு தூய்மையான மாவட்டமாகவும் மாற்றிடும் வகையில் பல்வேறு முன்னெடுப்பு பணிகள் மேற்கொள்ளப்பட்டு வருகிறது. குறிப்பாக பொது இடங்களில் குப்பை கொட்டுவதை தவிர்ப்பதோடு, அந்த குப்பைகளை அவரவர் வீடுகளிலேயே மட்கும் குப்பை மட்காத குப்பை என தரம் பிரிந்து தூய்மைப்பணியாளர்களிடம் வழங்குவதற்கான விழிப்புணர்வு ஏற்படுத்த வேண்டும்.

மேலும் அனைத்து பொதுமக்கள், இளைஞர்கள், தன்னார்வலர்கள், பள்ளி, கல்லூரி மாணவ மாணவியர்கள் உள்ளிட்டோர் தாங்கள் வசிக்கும் பகுதிகளை தூய்மையாக வைத்திட முன்வர வேண்டும். நமது மாவட்டத்தை தூய்மையான மாவட்டமாக மாற்றும் முயற்சியில் உங்களுடைய குடும்பத்தாரையும், நண்பர்களையும், சுற்றத்தாரையும் முழு ஆர்வத்துடன் பங்கேற்க செய்ய வேண்டும் என்பதை இத்தருணத்தில் கேட்டுக்கொள்வதோடு, பொது இடங்களில் குப்பை கொட்டுவதை நமது மாவட்டத்தை முழு தூய்மையான மாவட்டமாக மாற்றிட வேண்டும். இவ்வாறு மாவட்ட ஆட்சியர் தெரிவித்தார்.