பிரேசிலில் அடுக்குமாடி கட்டடம் இடிந்து விபத்து; 8 பேர் பலி.. மீட்பு பணிகள் தீவிரம்!

பிரேசிலில் 4 அடுக்கு மாடி குடியிருப்பு கட்டடம் இடிந்து விழுந்ததில் 8 பேர் உயிரிழந்தனர். இடிபாடுகளில் சிக்கியவர்களை தேடும் பணி தீவிரமாக நடைபெற்றது வருகிறது. 

பிரேசிலின் பெர்னாம்புகோ மாகாண தலைநகரான ரெசிஃப் நகரில் ஜங்கா என்ற பகுதியில் நான்கு தளங்கள் கொண்ட அடுக்குமாடி குடியிருப்பு கட்டடம் நேற்று காலை 6 மணியளவில் இடிந்து விழுந்தது. கவல் அறிந்து சம்பவ இடத்திற்கு விரைந்து வந்த தீயணைப்பு வீரர்கள் மற்றும் மீட்புப் படையினர் மீட்பு நடவடிக்கையில் விரைந்து ஈடுபட்டனர். 

கட்டடம் இடிந்து விழுந்ததில் ஒரு ஆண், 8 மற்றும் 5 வயது குழந்தைகள் உட்பட 8 பேர் இடிபாடுகளில் சிக்கி பலியாகினர், அதே நேரத்தில் 65 வயது பெண் மற்றும் 15 வயதுடைய இருவர் என 4 பேர் உயிருடன் மீட்கப்பட்டுள்ளனர். குழந்தைகள் உட்பட 5 பேரைக் காணவில்லை என்று சின்ஹுவா செய்தி நிறுவனம் தெரிவித்துள்ளது.  

கட்டடத்தின் ஒரு பகுதி முழுமையாக இடிந்து விழுந்துள்ளது, மற்றொரு பகுதி பாதியளவுக்கு இடிந்து விழுந்துள்ளது. மேலும் அந்த பகுதியில் தொடர் கனமழை பெய்து வருவதால், இடிபாடுகளில் சிக்கியுள்ளவர்களை மீட்பதில் சிரமம் ஏற்பட்டுள்ளதாக தீயணைப்பு துறையினர் தெரிவித்துள்னர்.  அடுக்குமாடி குடியிருப்பு கட்டடம் இடிந்து விழுந்ததற்கான காரணம் உடனடியாகத் தெரியவில்லை. சுமார் 15 லட்சம் மக்கள் வசிக்கும் கடலோர நகரமான ரெசிஃப் நகரில் சமீப நாட்களாக கடும் மழையுடன் போராடி வருவது குறிப்பிடத்தக்கது.