ஷாங்காய் ஒத்துழைப்பு மாநாட்டில் சீன அதிபரை சந்திக்கிறார் பிரதமர் மோடி

ஷாங்காய் ஒத்துழைப்பு மாநாட்டில் கலந்துகொள்ள இருக்கும் பிரதமர் நரேந்திர மோடி, சீன அதிபர் ஷி ஜின்பிங்கை சந்தித்துப் பேச இருப்பதாக சீனாவுக்கான இந்தியத் தூதர் விக்ரம் மிஸ்ரி தெரிவித்துள்ளார்.

சீனாவில் நேற்றுநடைபெற்ற நிகழ்ச்சி ஒன்றில் பங்கேற்ற விக்ரம் மிஸ்ரி செய்தியாளர்களிடம் கூறியதாவது: சீனாவின் வூஹான் நகரில் பிரதமர் நரேந்திர மோடிக்கும், அதிபர் ஷி ஜின்பிங்குக்கும் இடையே கடந்த ஆண்டு ஏப்ரல் மாதம் நடைபெற்ற அதிகாரப்பூர்வமற்ற பேச்சுவார்த்தை வெற்றிகரமாக அமைந்தது. 

இந்தப் பேச்சுவார்த்தைக்குப் பின்னர், பிரதமர் மோடியும் அதிபர் ஷி ஜின்பிங்கும் பல்வேறு கூட்டங்களின் நடுவே கடந்த ஆண்டில் மட்டும் 4 முறை சந்தித்துப் பேசியுள்ளனர்.இந்நிலையில், கிர்கிஸ்தான் தலைநகர் பிஷ்கெக்கில் அடுத்த வாரம் நடைபெற உள்ள ஷாங்காய் ஒத்துழைப்பு அமைப்பின் மாநாட்டின்போது, பிரதமர் மோடியும் அதிபர் ஷி ஜின்பிங்கும் சந்தித்துப் பேச உள்ளனர். இருநாடுகளுக்கு இடையேயான நல்லுறவில் வர்த்தகம் முக்கியப் பங்கை வகித்து வருகிறது  என்று மிஸ்ரி தெரிவித்தார்.