பின்னணிப் பாடகி எஸ்.ஜானகி காலமானார்: பிரதமர் மோடி, முதல்வர் ஜோசப் விஜய் இரங்கல்!

தென்னிந்தியாவின் நைட்டிங்கேல்' என்று புகழப்பட்ட பழம்பெரும் பின்னணிப் பாடகி எஸ்.ஜானகி (88) உடல்நலக் குறைவு காரணமாக மைசூருவில் காலமானார். 

இந்தியச் சினிமாவில் பழம்பெரும் பாடகியாகத் திகழ்ந்த எஸ்.ஜானகி, 'ஜானகியம்மா', 'கான கோகிலா', 'இசை அரசி' எனப் பல்வேறு பட்டங்களுடன் இந்திய சினிமா முழுமைக்கும் அறியப்பட்டவர். தமிழ், தெலுங்கு, மலையாளம், கன்னடம், இந்தி உட்படப் பல்வேறு மொழிகளில் சுமார் 48 ஆயிரத்திற்கும் மேற்பட்ட பாடல்களைப் பாடியுள்ளார். 4 தேசிய விருதுகளையும், 33 மாநில அரசு விருதுகளையும் வென்றுள்ளார். கடந்த 2016 ஆம் ஆண்டுக்குப் பிறகு சினிமாவில் இருந்து விலகி, மைசூருவில் உள்ள போகாடி பகுதியில் பேரப்பிள்ளைகளுடன் வசித்து வந்தார். 

கடந்த சில மாதங்களாகவே வயது முதிர்வு சார்ந்த உடல்நலக் குறைவால் அவதிப்பட்டு வந்த நிலையில், நேற்று சனிக்கிழமை அதிகாலை மைசூரு அப்பல்லோ மருத்துவமனையில் அனுமதிக்கப்பட்டார். அங்குத் தீவிர சிகிச்சைப் பிரிவில் சிகிச்சை பெற்று வந்த நிலையில், மாலையில் சிகிச்சைப் பலனின்றி மாரடைப்பு ஏற்பட்டு உயிர் பிரிந்தது. 

பொதுமக்கள், ரசிகர்கள் அஞ்சலி செலுத்துவதற்காக எஸ்.ஜானகி உடல் மைசூரு மகாராஜா கல்லூரி மைதானத்தில் இன்று வைக்கப்படுகிறது. அதன்பின்னர், பிற்பகல் 3 மணிக்கு இறுதி ஊர்வலம் தொடங்கப்பட்டு, கனியனகுந்தி என்ற இடத்தில் அரசு மரியாதையுடன் உடல் தகனம் செய்யப்படுகிறது. பாடகியின் மறைவுக்குப் பிரதமர் நரேந்திர மோடி, முன்னாள் முதல்வர் மு.க.ஸ்டாலின், நடிகர் ரஜினிகாந்த், கமல்ஹாசன் உள்ளிட்ட அரசியல், திரைத்துறைப் பிரபலங்கள் தங்களது ஆழ்ந்த இரங்கலைத் தெரிவித்து வருகின்றனர்.