தூத்துக்குடியின் பிரதான சாலையில் விபத்துக்களை தடுக்க நடவடிக்கை: பொதுமக்கள் கோரிக்கை!

தூத்துக்குடியின் பிரதான சாலையான தமிழ்ச்சாலையில் மூன்று சிக்னல்கள் உள்ளன. இந்த மூன்று சிக்னல்களில் அவ்வப்போது விபத்துக்கள் நடந்த வண்ணம் உள்ளன. குறிப்பாக தூத்துக்குடி மேற்கு பகுதியில் இருந்து கிழக்கு நோக்கி செல்லும் வாகனங்கள் இந்த மூன்று சிக்னல்களையும் தாண்டி செல்ல வேண்டி உள்ளது.

தூத்துக்குடி குரூஸ் பர்னாந்து சிலை அருகே உள்ள 4 முக்கு சந்திப்பில் அடிக்கடி விபத்துக்கள் ஏற்படுகிறது. பழைய பேருந்து நிலையத்தை தாண்டி குரூஸ் பர்னாந்து சிலை அருகே வரும்போது பால விநாயகர் கோவில் தெருவில் இருந்து வாகனங்கள் குறுக்கே செல்வதாலும் மேற்கு நோக்கி ஒரு வழிப்பாதையில் பிரபல ஜவுளி கடை கார் பார்க்கிங் செல்வதற்காக திரும்புவதால் அடிக்கடி இந்த பகுதியில் விபத்துக்கள் நடைபெற்ற வண்ணம் உள்ளன.

எனவே தூத்துக்குடி மாநகரப் போக்குவரத்து காவல்துறை மற்றும் மத்திய பாகம் காவல்துறையும் இணைந்து குருஸ் பர்னாந்து சிலை அருகே பேரிகாடுகள் வைத்து, ஒரு வழிப்பாதையில் வாகனங்கள் செல்லாமல் தடை செய்து பொதுமக்கள் வாகன போக்குவரத்திற்கு இடையூறு இல்லாமல் செல்வதற்கும், விபத்துகளில் இருந்து மக்களை காப்பதற்கும் உடனடியாக நடவடிக்கை எடுக்க வேண்டும் என வாகன ஓட்டிகளும் பொதுமக்களும் கோரிக்கை விடுத்துள்ளனர்.