ஜிம்பாப்வே ஒருநாள் கிரிக்கெட் தொடரை முழுமையாக வென்றது இந்தியா: சச்சினை முந்தினார் ஷுப்மன் கில்

ஜிம்பாப்வே அணிக்கு எதிரான கடைசி ஒருநாள் கிரிக்கெட் போட்டியில் 13 ரன்கள் வித்தியாசத்தில் வெற்றி பெற்ற இந்திய அணி தொடரை 3-0 என கைப்பற்றியது.

ஹராரேவில் நேற்று நடைபெற்ற 3-வது ஒருநாள் கிரிக்கெட் போட்டியில் முதலில் பேட் செய்த இந்திய அணி 50 ஓவர்களில் 8 விக்கெட்கள் இழப்புக்கு 289 ரன்கள் குவித்தது.தனது முதல் சதத்தை விளாசிய ஷுப்மன் கில் 97 பந்துகளில், ஒரு சிக்ஸர், 15 பவுண்டரிகளுடன் 130 ரன்கள் எடுத்தார். அவருக்கு உறுதுணையாக விளையாடிய இஷான் கிஷன் 61 பந்துகளில், 6 பவுண்டரிகளுடன் 50 ரன்கள் சேர்த்தார். இந்த ஜோடி 3-வது விக்கெட்டுக்கு 140 ரன்கள் சேர்த்தது. பிராடு இவான்ஸ் 5 விக்கெட்களை வீழ்த்தினார்.

290 ரன்கள் இலக்குடன் பேட் செய்த ஜிம்பாப்வே அணி சீரான இடைவெளியில் விக்கெட்களை இழந்தது. 36 ஓவர்களில் அந்த அணி 7 விக்கெட்கள் இழப்புக்கு 169 ரன்கள் எடுத்திருந்தது. இதன் பின்னர் சிகந்தர் ராசா மட்டையை சுழற்றினார். 88 பந்துகளில் சதம்விளாசிய அவரது அதிரடி ஆட்டம்ஜிம்பாப்வே அணிக்கு நம்பிக்கையை கொடுத்தது. கடைசி 3 ஓவர்களில் வெற்றிக்கு 33 ரன்கள் தேவையாக இருந்த நிலையில் அவேஷ் கான் வீசிய 48-வது ஓவரில் 16 ரன்கள் விளாசப்பட்டது. இந்த ஓவரின் கடைசி பந்தில் பிராடு இவான்ஸ் (28) ஆட்டமிழந்தார்.

12 பந்துகளில் 17 ரன்களே தேவையாக இருந்த நிலையில் ஷர்துல் தாக்குர் வீசிய 49-வது ஓவரின் 4-வது பந்தில் சிகந்தர் ராசா ஆட்டமிழந்தார். சிகந்தர் ராசா 95 பந்துகளில், 3 சிக்ஸர்கள், 9 பவுண்டரிகளுடன் 115 ரன்கள் விளாசினார். இந்த ஓவரில் வெறும் 2 ரன்கள் மட்டுமே சேர்க்கப்பட்டது. அவேஷ் கான் வீசிய கடைசி ஓவரில் 15 ரன்கள் தேவையாக இருந்த நிலையில் 3-வது பந்தில் கடைசி வீரராக விக்டர் நியாச்சி (0) போல்டானார். முடிவில் ஜிம்பாப்வே அணி 49.3 ஓவரில் 276 ரன்களுக்கு ஆட்டமிழந்தது.

13 ரன்கள் வித்தியாசத்தில் வெற்றி பெற்ற இந்திய அணி 3 ஆட்டங்கள் கொண்ட ஒருநாள் கிரிக்கெட் போட்டித் தொடரை 3-0 என முழுமையாக கைப்பற்றி கோப்பையை வென்றது. இந்திய அணி சார்பில் அவேஷ் கான் 3 விக்கெட்கள் வீழ்த்தினார். தீபக் ஷாகர், குல்தீப் யாதவ், அக்சர் படேல் ஆகியோர் தலா 2 விக்கெட்கள் வீழ்த்தினர்.

சர்வதேச ஒருநாள் கிரிக்கெட் போட்டியில் ஜிம்பாப்வே அணிக்கு எதிராக ஜாம்பவான் சச்சின் டெண்டுல்கர் கடந்த 1998-ல் 127 ரன்கள் விளாசியதே இந்திய வீரர் ஒருவர் எடுத்த அதிகபட்ச ரன்களாக இருந்தது. இந்த சாதனையை நேற்று ஷுப்மன் கில் 130 ரன்கள் விளாசி முறியடித்தார்.