தமிழகத்தில் இதுவரை ஒமைக்ரான் பாதிப்பு இல்லை: அமைச்சர் மா.சுப்பிரமணியன் பேட்டி

தமிழகத்தில் இதுவரை ஒமைக்ரான் வகை கரோனா தொற்று யாருக்கும் கண்டறியப்படவில்லை என தமிழக மருத்துவத் துறை அமைச்சர் மா.சுப்பிரமணியன் தெரிவித்துள்ளார்.

உலகம் முழுவதும் அதிவேகமாக பரவக் கூடிய புதிய வகை கரோனாவான ஒமைக்ரான் பரவி வரும் நிலையில், அனைத்து நாடுகளும் முன்னெச்சரிக்கை நடவடிக்கைகளை மேற்கொண்டு வருகின்றனர். இந்நிலையில், மதுரை விமான நிலையத்தில் செய்தியாளர்களிடம் மா.சுப்பிரமணியன் பேசியது: வெளிநாடுகளிலிருந்து தமிழகம் வந்துள்ள 477 பேருக்கு கரோனா பரிசோதனை செய்யப்பட்டுள்ளது. அவர்களில் யாருக்கும் ஒமைக்ரான் கரோனா கண்டறியப்படவில்லை. 

விமான பயணிகளுக்கு கரோனா கண்டறியப்பட்டால் உடனடியாக மருத்துவக் கல்லூரியில் தனி வார்டில் அனுமதிக்கப்பட்டு சிகிச்சை அளிக்கப்படும். மேலும், அனைவரும் முகக்கவசம் மற்றும் தடுப்பூசி போட்டால் ஊரடங்கு தேவைப்படாது. தமிழகத்தில் தடுப்பூசி செலுத்திக் கொள்வதில் மதுரை மாவட்டம் மிகவும் மோசமான நிலையில் உள்ளது. முதல் தவணை 71 சதவீதம் பேர் செலுத்திக் கொண்ட நிலையில், இரண்டாவது தவணை 32 சதவீதம் பேர் மட்டுமே செலுத்திக் கொண்டுள்ளனர்.