» செய்திகள் - விளையாட்டு » தமிழகம்

திரைப்பட இயக்குநர் விசு காலமானார்: திரையுலகினர், அரசியல் தலைவர்கள் அஞ்சலி

திங்கள் 23, மார்ச் 2020 8:42:35 AM (IST)

திரைப்பட இயக்குநர் விசு காலமானார். அவரது மறைவுக்கு, திரையுலகினர் அரசியல் தலைவர்கள் இரங்கல் தெரிவித்துள்ளனர்.

தமிழ் திரையுலகில் 1980 மற்றும் 90-களில் முன்னணி இயக்குனரும், நடிகருமாக இருந்தவர் விசு. இவருக்கு சில மாதங்களுக்கு முன்பு சிறுநீரக பாதிப்பு ஏற்பட்டது. இதற்காக சிகிச்சை பெற்று வந்தார். சில தினங்களுக்கு முன்பு உடல் நிலை மோசமடைந்ததால் சென்னை பெரும்பாக்கத்தில் உள்ள தனியார் ஆஸ்பத்திரியில் அனுமதித்தனர். டாக்டர்கள் தீவிர சிகிச்சை அளித்தும் பலன் இன்றி நேற்று மாலை விசு மரணம் அடைந்தார். அவருக்கு வயது 74. விசு உடல் துரைப்பாக்கத்தில் உள்ள வீட்டில் அஞ்சலிக்காக வைக்கப்பட்டு உள்ளது. திரையுலகினர் நேரில் அஞ்சலி செலுத்தினார்கள்.

விசு இயக்குனர், நடிகர், வசன கர்த்தா, கதாசிரியர், தொலைக்காட்சி நிகழ்ச்சி தொகுப்பாளர் என்று பன்முக திறமை கொண்டவர். ஆரம்பத்தில் இயக்குனர் கே.பாலசந்தரிடம் உதவியாளராக பணியாற்றினார். 1982-ல் கண்மணி பூங்கா என்ற படம் மூலம் இயக்குனராக அறிமுகமானார். மணல் கயிறு, டவுரி கல்யாணம், அவள் சுமங்கலிதான், கெட்டி மேளம், சிதம்பர ரகசியம், சம்சாரம் அது மின்சாரம், காவலன் என் கோவலன், பெண்மணி அவள் கண்மணி, திருமதி ஒரு வெகுமதி, வா மகளே வா, மீண்டும் சாவித்திரி உள்பட பல படங்களை இயக்கி உள்ளார். 

இதில் ‘சம்சாரம் அது மின்சாரம்’ படத்தில் முக்கிய கதாபாத்திரத்தில் நடித்தும் இருந்தார். 1986-ல் வெளியான இந்த படம் சிறந்த சமூக குடும்ப படமாக வெள்ளி விழா கண்டது. சிறந்த படத்துக்கான தேசிய விருதையும் பெற்றது.  இதுபோல் விசு நடித்து இயக்கி 1992-ல் வெளியான ‘நீங்க நல்லா இருக்கணும்’ படத்துக்கும் தேசிய விருது கிடைத்தது. சிவகுமார் நடித்த அவன் அவள் அது, ரஜினிகாந்தின் தில்லுமுல்லு, நெற்றிக்கண், புதுக்கவிதை, நல்லவனுக்கு நல்லவன், மிஸ்டர் பாரத் உள்ளிட்ட பல படங்களுக்கு திரைக்கதை எழுதி உள்ளார். தில்லுமுல்லு, குடும்பம் ஒரு கதம்பம், புதிய சகாப்தம், மெல்ல திறந்தது கதவு, மன்னன், வனஜா கிரிஜா, வா மகளே வா, அருணாசலம், சின்ன மாப்பிள்ளை உள்பட பல படங்களில் நடித்துள்ளார். 

மறைந்த விசுவுக்கு உமா என்ற மனைவியும் லாவண்யா, சங்கீதா, கல்பனா என்ற 3 மகள்களும் உள்ளனர். 2 மகள்கள் அமெரிக்காவில் உள்ளனர். இன்று மாலை (திங்கட்கிழமை) இறுதி சடங்கு நடக்கிறது. விசு மறைவுக்கு தி.மு.க. தலைவர் மு.க.ஸ்டாலின், த.மா.கா தலைவர் ஜி.கே.வாசன், முன்னாள் மத்திய மந்திரி பொன் ராதாகிருஷ்ணன், பா.ஜ.க. மாநில தலைவர் எல்.முருகன், சமத்துவ மக்கள் கட்சி தலைவர் சரத்குமார் உள்ளிட்ட பலர் இரங்கல் தெரிவித்துள்ளனர்.


மக்கள் கருத்து


மக்கள் பதிவு செய்யும் கருத்துகள் தணிக்கையின்றி பிரசுரமாகும் வகையில் மென்பொருள் வடிவமைக்கப்பட்டுள்ளது. தொழில்நுட்ப குறைபாடுகள் காரணமாக கருத்துக்கள் பதிவாவதில் சிறிது காலதாமதம் ஏற்பட வாய்ப்புள்ளது. வாசகர்களின் கருத்துக்களுக்கு நிர்வாகம் பொறுப்பாக மாட்டார்கள். நாகரீகமற்ற மற்றும் பிறர் மனதை புண்படுத்தகூடிய கருத்துகளை / வார்த்தைகளைப் பயன்படுத்துவதை தவிர்க்கும்படி கேட்டுக்கொள்கிறோம்.

ஆங்கிலத்தில் தட்டச்சு செய்ய Ctrl+G -ஐ அழுத்தவும்.



மேலும் தொடரும் செய்திகள்


Sponsored Ads




Thoothukudi Business Directory