» செய்திகள் - விளையாட்டு » தமிழகம்

தமிழகத்தில் 14 மாவட்டங்களில் கனமழைக்கு வாய்ப்பு: வானிலை ஆய்வு மையம் தகவல்

வெள்ளி 20, செப்டம்பர் 2019 9:11:08 AM (IST)

தமிழகத்தில் 3 நாட்களுக்கு மழை தொடரும் என்றும், 14 மாவட்டங்களில் இன்று கனமழைக்கு வாய்ப்பு இருக்கிறது என்றும் வானிலை ஆய்வு மையம் தெரிவித்து இருக்கிறது.

தென்மேற்கு பருவமழை தொடங்கியதில் இருந்து மேற்கு தொடர்ச்சி மலையை ஒட்டிய பகுதிகளில் மழை பெய்தது. தமிழகத்தின் இதர பகுதிகளில் வெப்பசலனம் காரணமாகவும், வங்கக்கடலில் அவ்வப்போது நிலவும் வளிமண்டல மேலடுக்கு சுழற்சி காரணமாகவும் மழை பெய்து கொண்டு இருக்கிறது. இந்த நிலையில் வளிமண்டல மேலடுக்கு சுழற்சியால் தமிழகத்தில் கடந்த 2 நாட்களாக பரவலாக நல்ல மழை பெய்து வருகிறது. மேலும் 3 நாட்களுக்கு மழை தொடரும் என்றும், 14 மாவட்டங்களில் கனமழைக்கு வாய்ப்பு இருப்பதாகவும் வானிலை ஆய்வு மையம் தெரிவித்து இருக்கிறது.

இதுகுறித்து சென்னை வானிலை ஆய்வு மைய இயக்குனர் எஸ்.பாலச்சந்திரன் நிருபர்களிடம் கூறியதாவது:- தெற்கு ஆந்திரா மற்றும் வட தமிழகத்தை ஒட்டியுள்ள பகுதிகளில் கிழக்கும், மேற்கும் சந்திக்கும் பகுதியில் வளிமண்டல மேலடுக்கு சுழற்சி நிலவி வருகிறது. இதன் காரணமாக கடந்த 24 மணி நேரத்தில் (நேற்று முன்தினம்) தமிழகத்தில் அநேக இடங்களிலும், வட தமிழகத்தில் ஓரிரு இடங்களில் கன முதல் மிக கனமழையும் பெய்துள்ளது.

அடுத்த 24 மணி நேரத்தை (இன்று) பொறுத்தவரையில் வட தமிழகத்தில் ஒரு சில இடங்களிலும், தென் தமிழகத்தில் ஓரிரு இடங்களிலும் லேசானது முதல் மிதமான மழை பெய்யக்கூடும். வட, மத்திய தமிழக பகுதிகளான திருவள்ளூர், வேலூர், கிருஷ்ணகிரி, தர்மபுரி, விழுப்புரம், திருவண்ணாமலை, காஞ்சீபுரம், திருப்பூர், தேனி, திண்டுக்கல், திருச்சி, பெரம்பலூர், அரியலூர் மற்றும் சேலம் ஆகிய 14 மாவட்டங்களின் ஓரிரு இடங்களில் கனமழைக்கும் வாய்ப்பு உள்ளது. தமிழகத்தில் தொடர்ந்து 3 நாட்களுக்கு இதேபோல் மழை தொடரும்.

சென்னையை பொறுத்தவரையில் இடைவெளி விட்டு அவ்வப்போது மிதமான மழையும், ஓரிரு இடங்களில் கனமழைக்கும் வாய்ப்பு இருக்கிறது. மீனவர்கள் அடுத்த 2 நாட்களுக்கு தென் கிழக்கு வங்கக்கடல் பகுதிகளுக்கு செல்ல வேண்டாம். தென்மேற்கு பருவமழை கடந்த ஜூன் மாதம் 1-ந் தேதி தொடங்கியது. கடந்த ஜூன் மாதத்தில் தமிழகத்தில் இயல்பை விட 39 சதவீதமும், ஜூலை மாதத்தில் 22 சதவீதமும் குறைவாக மழை பெய்தது. கடந்த ஆகஸ்டு மாதத்தில் இயல்பை விட 36 சதவீதமும், இந்த மாதத்தில் இதுவரை 8 சதவீதமும் அதிகமாக மழை பெய்துள்ளது.

பருவமழை காலத்தின் பின்பகுதியில் நல்ல மழை கிடைத்து இருக்கிறது. ஒட்டுமொத்தமாக தென் மேற்கு பருவமழை காலத்தில் தமிழகம் இதுவரை 29 செ.மீ. மழை பெற்று இருக்க வேண்டும். தற்போது 32 செ.மீ. வரை மழை பதிவாகி இருக்கிறது. இது இயல்பை விட 8 சதவீதம் அதிகம் ஆகும். இவ்வாறு அவர் கூறினார்.


மக்கள் கருத்து


மக்கள் பதிவு செய்யும் கருத்துகள் தணிக்கையின்றி பிரசுரமாகும் வகையில் மென்பொருள் வடிவமைக்கப்பட்டுள்ளது. தொழில்நுட்ப குறைபாடுகள் காரணமாக கருத்துக்கள் பதிவாவதில் சிறிது காலதாமதம் ஏற்பட வாய்ப்புள்ளது. வாசகர்களின் கருத்துக்களுக்கு நிர்வாகம் பொறுப்பாக மாட்டார்கள். நாகரீகமற்ற மற்றும் பிறர் மனதை புண்படுத்தகூடிய கருத்துகளை / வார்த்தைகளைப் பயன்படுத்துவதை தவிர்க்கும்படி கேட்டுக்கொள்கிறோம்.

ஆங்கிலத்தில் தட்டச்சு செய்ய Ctrl+G -ஐ அழுத்தவும்.



மேலும் தொடரும் செய்திகள்

Sponsored Ads

Sterlite Industries (I) Ltd

Anbu Communications



Thoothukudi Business Directory