அணுமின் நிலையத்தை மூடும் வரை போராட்டம் தான்: கோவளம் மாநாட்டில் உதயகுமார் உறுதி!!

கூடங்குளம் அணுமின் நிலையத்தை மூட வலியுறுத்தி கன்னியாகுமரியை அடுத்த கோவளத்தில் இன்று அணுசக்திக்கெதிரான மக்கள் இயக்க மாநாடு நடைபெற்றது அணுசக்திக்கெதிரான மக்கள் இயக்க மீனவர் அமைப்புக்களும், கூடங்குளம் பகுதி மக்களும் சேர்ந்து இந்த மாநாட்டை நடத்துகின்றனர். இந்த மாநாட்டில் பங்கேற்க இடிந்தகரை பகுதி மீனவர்கள் 18 பேரூந்துகளிலும்,5 மினி பேரூந்துகளிலும், கூடங்குளம் பகுதி மக்கள் 15 மினி பேரூந்துகளிலும் சென்றனர் 

தூத்துக்குடி, புன்னக்காயல், பழையகாயல், மணப்பாடு, பெரியதாழை, உவரி, கன்னியாகுமரி, சின்னமுட்டம், கோவளம் உள்ளிட்ட மீனவ கிராம மக்களும் மாநாட்டில் கலந்து கொண்டனர்.

காலையில் நடைபெற்ற அறிவரங்கத்திற்கு எம்.ஜி. தேவசகாயம் தலைமை தாங்கினார். கன்னியாகுமரி பங்குத் தந்தை லியோன் கென்சன் வரவேற்புரை நிகழ்த்தினார். அறிவரங்கத்தில் டாக்டர் உதயகுமார், மனோ தங்கராஜ், பங்குத்தந்தை ஜேசுராஜ், ராஜாவூர் ராஜேந்திரன், திருநெல்வேலி பேராசிரியர் அருணாச்சலம், 

டெல்லி பத்திரிகையாளர் பிரபுல் பித்வாய், புதுடில்லி விஞ்ஞானி சௌமியா தத்தா, கேரள விஞ்ஞானிகள் நீலகண்டன், பத்மநாபன், அலகாபாத் விஞ்ஞானி பேராசிரியர் பன்வாரிலால் சர்மா, கல்பாக்கம் மருத்துவர் புகழேந்தி, கோயம்புத்தூர் மருத்துவர் ஆர்.ரமேஷ், மதுரை வழக்கறிஞர் லஜபதிராய், சென்னை வழக்கறிஞர் மோகன், சென்னை பேராசிரியர் .சிவகுமார், நாகர்கோவில் விஞ்ஞானி லால் மோகன், நாகர்கோவில் மருத்துவர் சுமித்ரா ரகுவரன், அணுசக்திக்கெதிரான மக்கள் இயக்கம் டேவிட் உள்ளிட்டோர் கலந்து கொண்டனர்.

முன்னதாக இந்த இயக்கத்தை வழி நடத்தி வரும் டாக்டர் உதயகுமார் கூறுகையில் கூடங்குளம் அணுமின் நிலையத்தை மூடும் வரையில் பல்வேறு போராட்டங்களை நடத்துவோம், இன்று நடக்கும் மாநாட்டில் அறிவியல் அறிஞர்கள், வழக்கறிஞர்கள், பொறியியல் நிபுணர்கள், அரசியல் கட்சி நிபுணர்கள் உரையாற்றுவார்கள் இந்த மாநாடு வெற்றிகரமாக அமையும். எனவே மத்திய அரசு காலம் தாழ்த்தாமல் கூடங்குளம் அணுமின்நிலையத்தை உடனடியாக மூட வேண்டும் என்று அவர் கூறினார்.